ܨܠܽܘܬܳܐ ܕܫܽܘܪܳܝܳܐ

ܫܰܟܶܢ ܠܰܢ ܡܳܪܝܳܐ ܐܰܠܳܗܳܐ ܝܺܕܰܥܬܳܐ ܕܡܶܠܰܝ̈ܟ ܐܠܰܗܳܝ̈ܳܬܳܐ ܘܣܽܘܟܳܠܐܴ ܕܰܩܝܳܡܬܳܟ ܦܳܪܽܘܩܳܝܬܳܐ: ܘܥܽܘܬܪܳܐ ܪܰܒܳܐ ܕܛܰܝܒܽܘܬܳܟ ܘܰܕܒܰܣܺܝܡܽܘܬܳܟ ܘܗܰܒܠܰܢ ܡܳܪܰܢ ܐܠܰܗܰܢ ܕܰܒܚܰܕܽܘܬܳܐ ܢܶܛܰܪ ܦܽܘܩܕܳܢܰܝ̈ܟ: ܘܢܶܓܡܽܘܪ ܘܰܢܫܰܡܠܐܷ ܨܶܒܝܳܢܳܟ: ܘܢܶܫܬܘܶܐ ܠܒܽܘܪ̈ܟܳܬܳܐ ܘܰܠܪ̈ܰܚܡܰܝܟ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ ܘܡܶܬܓܰܠܝܳܐ ܐܠܰܗܽܘܬܳܟ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܥܳܠܡܝ̣ܢ܀

ܦܪܽܘܡܝܽܘܢ

ܬܶܫܒܽܘܚܬܳܐ ܘܬܰܘܕܺܝܬܳܐ ܘܣܶܓܕܬܳܐ ܘܗܶܕܪܳܐ ܘܩܽܘܠܳܣܳܐ ܘܪܽܘܡܪܳܡܳܐ: ܥܰܡ ܣܳܥܽܘܪܽܘܬܳܐ ܕܰܥܒܳܕ̈ܶܐ ܛܳܒ̈ܶܐ: ܘܚܽܘܫ̈ܳܒܶܐ ܙܗܰܝ̈ܳܐ ܘܩܰܕܺܝ̈ܫܶܐ: ܘܪܺܝܚܳܐ ܒܰܣܺܝܡܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܪܺܝܫܺܝܬܳܐ ܡܩܰܒܰܠܬܳܐ ܕܕܽܘܒܳܪ̈ܶܐ ܢܰܨܺܝ̈ܚܶܐ ܕܠܐܴ ܡܳܝܽܘܬܽܘܬܳܐ ܢܶܫܬܘܶܐ ܕܰܢܩܰܪܶܒ: ܠܪܺܝܫ ܟܽܘܡܪ̈ܶܐ ܕܬܰܘܕܺܝܬܰܢ ܝܶܫܽܘܥ ܡܫܺܝܚܳܐ ܕܶܒܚܳܐ ܚܰܣܝܳܐ ܘܩܰܕܺܝܫܳܐ: ܗ̣ܽܘ ܒܰܩܢܽܘܡܶܗ ܥܒ̣ܰܕ ܕܽܘܟܳܝܳܐ ܕܰܚܛܳܗܰܝ̈ܢ: ܘܚܰܣܺܝ ܠܬܺܐܒܶܝܠ ܒܰܕܒܺܝܚܽܘܬܶܗ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܕܙܳܕܶܩ ܠܶܗ: ܘܬܰܘܕܺܝܬܳܐ ܕܡܶܬܬܚܺܝܒܳܐ ܠܶܗ ܘܥܳܢ̈ܶܗ ܕܦܰܪܩܳܗ̇ ܒܚܰܫ̈ܶܐ ܕܰܙܩܺܝܦܽܘܬܶܗ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܐܰܠܳܗܳܐ ܗܰܘ ܪܰܒܳܐ ܗܰܘ ܝܰܠܕܳܐ ܡܬܽܘܡܳܝܳܐ ܗܰܘ ܝܳܕܽܘܥܳܐ ܕܟܰܣ̈ܝܳܬܳܐ ܘܰܕܓܰܠܝ̈ܳܬܳܐ ܘܒܳܚܽܘܪܳܐ ܕܠܶܒܰܘ̈ܳܬܳܐ ܗܰܘ ܕܝܳܕܰܥ ܟܽܠ ܡܶܕܶܡ ܩܕܳܡ ܗܘܳܝܳܐ ܕܺܝܠܶܗ: ܘܠܰܝܬ ܡܶܕܶܡ ܣܳܟ ܕܰܛܫܶܐ ܩܕܳܡ ܥܰܝܢܰܝ̈ܟ: ܘܠܐܴ ܡܶܕܶܡ ܕܰܛܥܶܐ ܠܳܟ: ܐܶܠܐܴ ܟܽܠܗܶܝܢ ܟܰܣ̈ܝܳܬܳܐ ܥܰܪ̈ܛܶܠܳܝܳܬܳܐ ܘܓܰܠܝ̈ܳܬܳܐ ܐܝ̣ܬܝܗܶܝܢ ܠܳܟ: ܐܰܢ̱ܬ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ: ܘܢܳܛܰܪ ܩܽܘܫܬܳܐ ܠܐܴܠܶܦ ܕܳܪ̈ܺܝܢ ܐܶܬܕܰܟܰܪ ܒܥܶܕܳܢܳܐ ܗܳܢܳܐ ܕܰܩܝܳܡܬܳܐ ܕܺܝܠܳܟ ܘܰܕܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܘܕܰܨܠܺܝܒܽܘܬܳܟ ܡܰܚܝܳܢܺܝܬܳܐ: ܘܰܕܡܰܘܬܳܟ ܡܰܚܝܳܢܳܐ ܕܺܝܠܰܢ ܥܰܠ ܒܳܠܰܢ ܡܰܝܬܶܝܢܰܢ: ܕܽܘܟܪܳܢܳܐ ܛܳܒܳܐ ܥܳܒܕܺܝܢܰܢ ܒܥܶܕܳܢܳܐ ܗܳܢܳܐ ܠܩܰܕܺܝܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܕܺܝܠܶܕܬܳܟ ܒܰܒܬܽܘܠܽܘܬܳܗ̇: ܘܕܰܢܒܺܝ̈ܶܐ ܕܐܬܢܰܒܺܝܘ ܥܠܰܝܟ ܫܰܪܺܝܪ̈ܳܬܳܐ: ܘܠܰܫܠܺܝ̈ܚܶܐ ܕܰܐܟ̣ܪܶܙܘ̱ ܠܰܣܒܰܪܬܳܐ ܕܺܝܠܳܟ ܐܶܘܰܢܓܶܠܳܝܬܳܐ: ܘܰܐܝܟ ܡܰܝ̈ܳܐ ܚܰܝ̈ܶܐ ܐܰܫܩܺܝܘ ܠܰܒܪܺܝܬܳܐ ܫܶܩܝܳܐ ܚܰܝܳܐ ܕܝܽܘܠܦܳܢܳܟ: ܘܣܳܗ̈ܕܶܐ ܒܪ̈ܺܝܟܶܐ ܘܰܢܟܺܝ̣̈ܣܶܐ ܗܳܢܘܢ̇ ܕܶܐܬܩܰܛܰܠܘ̱ ܒܪܶܚܡܬܳܟ: ܘܣܰܝܒܰܪܘ̱ ܫܶܢ̈ܕܶܐ ܘܽܐܘ̣ܠܨܳܢ̈ܶܐ ܡܶܛܽܠܳܬܳܟ: ܘܰܐܥܕܺܝܘ ܟܠܺܝ̣̈ܠܐܷ ܕܙܳܟܽܘܬܳܐ ܥܰܠ ܣܰܒܪܳܟ: ܐܳܦ ܡܰܘ̈ܕܝܳܢܶܐ ܕܰܐܘܕܺܝܘ ܒܡܳܪܽܘ̣ܬܳܟ: ܡܰܠܦܳܢ̈ܶܐ ܕܰܠܒ̣ܰܟܘ̱ ܠܰܫܪܳܪܳܐ ܕܺܝܠܳܟ: ܟܰܫܺܝܪ̈ܶܐ ܕܰܦܠܰܚ̣ܘ̱ ܒܟܰܪܡܳܟ ܘܰܡܫܰܡ̈ܫܳܢܶܐ ܕܰܥܒ̣ܰܕܘ̱ ܨܶܒܝܳܢܳܟ: ܟܳܗ̈ܢܶܐ ܕܫܰܡ̣ܶܫܘ̱ ܠܐ̱ܪ̈ܳܙܶܐ ܕܡܰܕܒܚܳܟ ܩܰܕܺܝܫܳܐ: ܘܥܰܡܗܽܘܢ ܕܶܝܢ ܡܶܬܕܰܟܪܺܝܢܰܢ ܠܐܱܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܕܠܰܒܫܽܘܟ ܒܰܥܡܳܕܳܐ ܘܰܐܘܕܺܝܘ ܘܗܰܝܡܶܢ̣ܘ̱ ܒܰܡܕܰܒܪܳܢܽܘܬܳܟ: ܥܶܛܪܳܐ ܕܒܶܣ̈ܡܶܐ ܕܰܡܩܰܪܒܺܝܢܰܢ ܠܳܟ ܒܥܺܐܕܳܐ ܗܳܢܳܐ ܕܢܽܘܚܳܡܳܟ ܫܒܺܝܚܳܐ: ܒܗܳܢܳܐ ܝܰܘܡܳܐ ܓܶܝܪ ܕܚܰܕ ܒܫܰܒܳܐ ܬܡܺܝܢܳܝܳܐ ܘܩܰܕܡܳܝܳܐ ܕܒܶܗ ܡܚܰܘܝܳܐ ܒܪܺܝܬܳܐ ܫܽܘܘܕܳܥܳܐ ܕܫܽܘܪܳܝܳܐ ܘܫܽܘܠܳܡܳܐ: ܥܰܠ̣ܬ ܨܶܝܕ ܬܰܠܡܺܝ̈ܕܰܝܟ ܒܪܰܡܫܳܐ ܕܚܰܕ ܒܫܰܒܳܐ ܠܓܰܘ ܥܶܠܺܝܬܳܐ ܟܰܕ ܬܰܪ̈ܥܶܐ ܘܟܰܘ̈ܶܐ ܐܰܚܺܝܕܺܝܢ ܗ̱ܘܰܘ: ܘܶܐܡ̣ܰܪܬ ܠܗܽܘܢ ܫܠܳܡܳܐ ܥܰܡܟܽܘܢ ܬܰܠܡܺܝ̣̈ܕܰܝ ܐܶܢܳܐ ܐ̱ܢܳܐ ܠܐܴ ܬܶܕܚܠܽܘܢ: ܘܚܰܘܺܝܬ ܐܶܢܽܘܢ ܐܺܝܕܰܝ̈ܟ ܘܪ̈ܶܓܠܰܝܟ ܘܣܶܛܪܳܟ ܘܕܽܘܟܰܬ݀ ܠܽܘܟܳܝܬܳܐ: ܘܗܰܝܡܶܢܘ̱ ܘܶܐܫܬܰܪܰܪܘ̱ ܫܠܺܝ̈ܚܶܐ: ܘܰܒܗܳܢܳܐ ܪܰܡܫܳܐ ܕܚܰܕ ܒܫܰܒܳܐ ܩ̣ܪܰܝܬ ܠܬܳܐܘܡܰܐ ܫܠܺܝܚܳܐ ܕܶܐܬܦܰܠܰܓ ܘܰܐܓܶܫܬܳܝܗ̱ܝ ܕܰܦܢܳܟ ܡܰܪܕܝܰܬ݀ ܚܰܝ̈ܶܐ ܘܚܰܕ̈ܘܳܬܳܐ ܘܚܰܘܺܝܬ ܠܶܗ ܕܽܘܟܰܬ݀ ܨܶܨ̈ܶܐ ܘܠܽܘܟܳܝܬܳܐ: ܘܟܰܕ ܗܰܝܡܶܢ ܘܰܐܫ̣ܰܪ ܘܰܐܘܕܺܝ ܘܰܗܘܳܐ ܡܗܰܝܡܢܳܐ ܒܳܟ ܘܒܰܩܝܳܡܬܳܟ ܡܫܰܒܰܚܬܳܐ: ܒܗܳܢܳܐ ܪܰܡܫܳܐ ܕܚܰܕ ܒܫܰܒܳܐ ܬܡܺܝܢܳܝܳܐ ܘܩܰܕܡܳܝܳܐ ܕܰܩܝܳܡܬܳܟ ܡܫܰܒܰܚܬܳܐ: ܫܠܳܡܳܐ ܫܰܦܝܳܐ ܝܰܗ̣ܒܬ ܠܗܽܘܢ ܠܬܰܠܡܺܝ̈ܕܶܐ ܕܺܝܠܳܟ ܩܰܕܺܝ̈ܫܶܐ: ܘܶܐܡ̣ܰܪܬ ܠܗܽܘܢ̇ ܕܝܶܗܒܶܬ ܠܟܽܘܢ ܚܰܝܠܐܴ ܕܰܬܕܽܘܫܽܘܢ ܚܘ̈ܰܘܳܬܳܐ ܘܥܶܩܰܪ̈ܒܶܐ ܘܟܽܠܶܗ ܚܰܝܠܐܴ ܕܰܒܥܶܠܕܒܳܒܳܐ: ܘܡܶܟܺܝܠ ܐܳܘ ܫܠܺܝ̣̈ܚܰܝ ܣܺܝܡܘ̱ ܐܰܦܰܝ̈ܟܽܘܢ ܠܰܣܒܰܪܬܳܐ ܘܰܠܡܰܟܪܳܙܽܘ ܐܳܦ ܠܡܰܠܳܦܽܘ ܠܟܽܠܗܽܘܢ ܥܰܡ̱̈ܡܶܐ: ܘܰܠܡܰܥܡܳܕܽܘ ܒܰܫܡܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ: ܚܰܕ ܡܳܪܝܳܐ ܕܶܐܬܓܰܫܰܡ: ܚܰܕ ܐܰܠܳܗܳܐ ܕܶܐܬܒܰܪܢܰܫ: ܘܗ̣ܽܘ ܟܰܕ ܗ̣ܽܘ ܕܝܳܬܶܒ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ: ܘܡܶܬܓܰܝܶܐܐ ܥܰܠ ܓܺܝ̈ܓܠܐܷ ܕܚܺܝ̣̈ܠܳܬܳܐ: ܗ̣ܽܘ ܐܝ̣ܬܰܘܗ̱ܝ ܕܰܠܒ̣ܶܫ ܦܰܓܪܶܗ ܕܳܐܕܳܡ ܘܰܢܚ̣ܶܬ ܒܰܒܥܳܬܶܗ: ܘܦܰܪܩܶܗ ܡܶܢ ܒܥܶܠܕܒܳܒܶܗ: ܘܳܐܬܶܐ ܠܚܰܪܬܶܗ ܕܥܳܠܡܳܐ ܘܰܡܢܰܚܶܡ ܠܶܗ: ܘܰܠܝܳܪܬܽܘܬܶܗ ܗܳܝ ܩܰܕܡܳܝܬܳܐ ܡܰܦܢܶܐ ܠܶܗ: ܘܰܒܛܽܘ̈ܒܶܐ ܪ̈ܓܺܝܓܶܐ ܕܡܰܠܟܽܘܬܶܗ ܡܒܰܣܶܡ ܠܶܗ: ܡܶܛܽܠ ܕܶܝܢ ܕܨܰܠܡܳܐ ܕܪܰܒܽܘܬܶܗ ܐܝ̣ܬܰܘܗ̱ܝ: ܘܥܰܠܗܳܝ ܚܰܢܶܗ ܘܦܰܪܩܶܗ: ܘܰܚܢܰܢ ܝܰܠܕܰܘ̈ܗ̱ܝ ܕܰܠܗܰܝܡܳܢܽܘܬܳܐ ܕܰܫܠܺܝ̈ܚܶܐ ܩܰܒܶܠܢܰܢ ܘܡܶܢ ܝܽܘܠܦܳܢܗܽܘܢ ܐܶܬܢܰܗܰܪܢܰܢ ܘܰܒܚܶܟܡܰܬܗܽܘܢ ܐܶܬܚܰܟܰܡܢܰܢ ܘܡܶܢܗܽܘܢ ܦܽܘܩܕܳܢ̈ܶܐ ܩܰܕܺܝ̈ܫܶܐ ܢܣܰܒܢܰܢ: ܘܰܣܒܰܪܬܳܐ ܕܚܰܝ̈ܶܐ ܒܺܐܝܕܰܝ̈ܗܽܘܢ ܐܶܬܝܰܗܒܰܬ݀ ܠܰܢ: ܘܡܰܠܟܽܘܬܳܐ ܕܰܫܡܰܝܳܐ ܐܰܘܪܶܬܘ̱ ܠܰܢ: ܘܒܽܘ̈ܣܳܡܶܐ ܪ̈ܽܘܚܳܢܳܝܶܐ ܕܒܰܓܢܽܘܢܳܐ ܕܚܰܝ̈ܶܐ ܐܰܩܢܺܝܘ ܠܰܢ: ܐܰܝܟܰܢܳܐ ܕܒܰܨܠܰܘ̈ܳܬܗܽܘܢ ܢܶܫܟܰܚ ܫܽܘܒܩܳܢܳܐ: ܘܰܒܒܳܥ̈ܘܳܬܗܽܘܢ ܢܶܬܚܰܣܽܘܢ ܚܰܘ̈ܒܰܝܢ ܘܰܚܛܳܗܰܝ̈ܢ: ܘܒܰܦܝܳܣ̈ܳܬܗܽܘܢ ܢܶܬܬܢܺܝ̈ܚܳܢ ܪ̈ܽܘܚܳܬܗܽܘܢ ܕܥܰܢܺܝ̈ܕܰܝܢ ܘܢܶܫܬܰܒ̈ܩܳܢ ܣܰܟܠܘ̈ܳܬܰܢ: ܘܰܒܬܰܟ̈ܫܦܳܬܗܽܘܢ ܢܰܡܠܶܟ ܫܰܝܢܳܐ ܘܰܫܠܳܡܳܐ ܒܰܒܪܺܝܬܳܐ: ܘܢܶܬܦܰܨܽܘܢ ܦܰܓܪ̈ܶܐ ܘܢܰܦ̈ܫܳܬܳܐ ܘܪ̈ܽܘܚܳܬܳܐ ܕܰܐܒܳܗܰܝ̈ܢ ܘܰܐܚܰܝ̈ܢ ܘܰܕܪ̈ܰܒܳܢܰܝܢ ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ ܘܒܰܬܪܺܝܨܽܘܬ ܫܽܘܒܚܳܐ ܘܰܡܣܰܟܶܝܢ ܠܓܶܠܝܳܢܳܟ ܕܡܶܢ ܫܡܰܝܳܐ ܕܰܚܢܰܢ ܘܗ̣ܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀

ܥܶܛܪܳܐ

ܦܺܝܪܡܳܐ ܕܚܽܘܣܳܝܳܐ ܡܫܺܝܚܳܐ ܕܶܐܬܬܠܺܝ ܥܰܠ ܩܰܝܣܳܐ ܕܰܨܠܺܝܒܳܐ ܘܰܗ̣ܘܳܐ ܕܶܒܚܳܐ ܚܠܳܦ ܟܽܠܰܢ: ܘܒܰܛܶܠ ܕܶܒ̈ܚܶܐ ܕܺܐܝܣܪܳܐܶܝܠ: ܘܢܳܚܰܬ݀ ܣܰܟܺܝܢܳܐ ܕܒܶܝܬ ܠܶܘܺܝ: ܘܒܶܛܠܰܬ݀ ܟܽܘܡܪܽܘܬܳܐ ܕܒܶܝܬ ܐܰܒܪܰܡ: ܘܣܰܒܪܳܐ ܘܒܽܘܝܳܐܳܐ ܐܰܩܢܺܝ ܠܰܦܪ̈ܺܝܩܶܐ: ܐܰܢ̱ܬ ܡܳܪܝ̱ ܗܳܫܳܐ ܩܰܒܶܠ ܕܶܒܚܰܝ̈ܢ ܘܩܽܘܪ̈ܒܳܢܰܝܢ ܘܥܶܛܪ̈ܰܝܢ ܘܡܰܥܣܳܪ̈ܰܝܢ: ܘܰܥܒܶܕ ܪ̈ܰܚܡܶܐ ܕܛܰܝܒܽܘܬܳܟ ܥܰܠ ܟܽܠܰܢ: ܡܫܺܝܚܳܐ ܣܰܒܪܳܐ ܕܚܰܝܰܝ̈ܢ ܘܦܳܪܽܘܩܳܐ ܕܢܰܦ̈ܫܳܬܰܢ ܕܢܶܙܡܰܪ ܠܳܟ ܫܽܘܒܚܳܐ ܡܶܢ ܣܶܦ̈ܘܳܬܰܢ ܡܳܪܰܢ ܘܰܐܠܳܗܰܢ܀

ܚܽܘܬܳܡܳܐ

ܚܰܘܳܐ ܠܰܢ ܐܰܠܳܗܳܐ ܐܽܘܪܚܳܐ ܕܦܽܘܩܕ̈ܳܢܰܝܟ ܐܶܘܰܢܓܶܠܳܝ̈ܶܐ ܘܗܰܕܳܐ ܠܰܢ ܒܰܫܒܺܝ̈ܠܐܷ ܕܺܝܠܳܟ ܡܰܚ̈ܝܳܢܶܐ: ܘܕܰܒܰܪ ܠܰܢ ܒܚܰܝ̈ܶܐ ܠܐܴ ܥܕܺܝ̣̈ܠܐܷ ܘܚܰܕܳܐ ܠܰܢ ܒܰܓܢܽܘܢܳܟ ܕܠܐܴ ܥܳܒܰܪ: ܘܒܰܣܶܡ ܠܰܢ ܒܛܽܘ̈ܒܶܐ ܕܡܰܠܟܽܘܬܳܟ: ܘܰܐܫܪܳܐ ܠܰܢ ܒܰܣܡܳܟܳܟ ܕܰܡܠܐܷ ܓܶܐܘ̈ܳܬܳܐ: ܘܒܰܣܶܡ ܠܰܢ ܒܰܚܙܳܬܳܟ: ܕܢܰܣܶܩ ܠܳܟ ܫܽܘܒܚܳܐ ܒܡܶܐܬܺܝܬܳܟ: ܗܳܝ ܕܬܰܪܬܶܝܢ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ܀