ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܚܰܝܳܐ ܘܡܰܚܝܳܢܳܐ ܕܰܒܩܳܠܶܗ ܬܰܩܺܝܦܳܐ ܡܺܝ̈ܬܶܐ ܡܶܬܢܰܚܡܺܝܢ ܘܰܒܪܶܡܙܳܐ ܕܦܽܘܩܕܳܢܶܗ ܦܰܓܪ̈ܶܐ ܡܶܬܪܰܟܒܺܝܢ: ܠܗܰܘ ܚܰܝܳܐ ܘܰܐܚܺܝܕ ܟܽܠ ܕܡܶܢ ܥܰܦܪܳܐ ܘܰܚܒܳܠܐܴ ܕܰܫܝܽܘܠ ܡܢܰܦܶܨ ܠܟܽܠܳܗ̇ ܓܒܺܝܠܬܶܗ: ܘܰܒܪܶܡܙܶܗ ܕܠܐܴ ܡܶܬܥܨܶܐ ܡܺܝ̈ܬܶܐ ܐܶܣܛܰܠ ܫܽܘܒܚܳܐ ܡܶܬܥܰܛܦܺܝܢ: ܘܒܰܥ̈ܢܳܢܶܐ ܕܢܽܘܗܪܳܐ ܠܐܘܪܥܶܗ ܡܰܫܩܠܺܝܢ ܘܩ̈ܳܠܰܝ ܫܽܘܒܚܳܐ ܠܶܗ ܙܳܡܪܺܝܢ: ܕܒܺܐܝ̈ܕܰܘܗ̱ܝ ܐܶܢܶܝܢ ܢܰܦ̈ܫܳܬܳܐ ܕܺܝܠܰܢ ܠܶܗ ܡܰܙܥܩܺܝܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܡܶܠܬܳܐ ܡܬܽܘܡܳܝܳܐ ܗܰܘ ܫܶܡܫܳܐ ܕܙܰܕܺܝܩܽܘܬܳܐ: ܨܶܡܚܳܐ ܕܡܶܢ ܐܰܒܳܐ ܘܢܽܘܗܪܳܐ ܕܰܐܝܠܶܝܢ ܕܰܒܛܶܠܴ̈ܠܰܝ ܡܰܘܬܳܐ ܝܳܬܒܺܝܢ ܗ̱ܘܰܘ: ܗܰܘ ܕܛܽܘܦܣܳܐ ܢܰܗܺܝܪܳܐ ܘܰܡܥܰܠܝܳܐ ܚܰܘܺܝ ܘܐܰܠܶܦ ܠܰܢ: ܟܰܕ ܐܳܡܰܪ ܒܡܶܠܰܘ̈ܗ̱ܝ ܚܰܝ̈ܳܬܳܐ ܕܰܒܪܶܗ ܕܐ̱ܢܳܫܳܐ ܠܰܝܬ ܠܶܗ ܐܰܝܟܳܐ ܕܢܶܣܡܽܘܟ ܪܺܝܫܶܗ: ܘܰܐܝܟܳܐ ܕܰܚܛܺܝܬܳܐ ܘܥܰܘܠܐܴ ܡܶܫܬܰܡܰܫ ܠܐܴ ܥܳܡܰܪ ܬܰܡܳܢ ܐܰܠܳܗܳܐ ܘܠܰܝܬ ܠܶܗ ܕܽܘܟܬܳܐ ܕܢܶܣܡܽܘܟ ܪܺܝܫܶܗ: ܘܕܰܒܪܶܗ ܕܐ̱ܢܳܫܳܐ ܠܐܴ ܐܶܬܳܐ ܠܡܶܫܬܰܡܳܫܽܘ ܠܥܳܒܕ̈ܰܝ ܨܶܒܝܳܢܶܗ: ܘܰܕܢܶܬܶܠ ܢܰܦܫܶܗ ܚܠܳܦܰܝܗܽܘܢ ܠܡܰܘܬܳܐ: ܐܰܚܰܝ̈ܢ ܟܳܗ̈ܢܶܐ ܘܰܡܫܰܡ̈ܫܳܢܶܐ ܕܐ̱ܪ̈ܳܙܰܝ ܥܺܕܬܳܟ ܩܰܕܺܝܫܬܳܐ ܗܳܝ ܕܒܰܕܡܳܐ ܕܺܝܠܳܟ ܦܪܰܩܬܳܗ̇: ܗܳܢܘܢ̇ ܕܰܣܒ̣ܰܠܘ̱ ܚܠܳܦܰܝܟ ܫܶܢ̈ܕܶܐ ܘܩܺܝܢܕܽܘܢܺܝ̈ܣܶܐ ܕܰܕܡܳܐ: ܘܰܗܘܰܘ ܥܺܝܪ̈ܶܐ ܘܰܡܕܰܟ̈ܝܳܢܶܐ ܘܢܳܛܽܘܪ̈ܶܐ ܕܦܽܘܩ̈ܕܳܢܶܐ ܕܺܝܠܳܟ ܥܠܰܝܗܽܘܢ ܐܶܣܬܡܶܟ ܨܶܒܝܳܢܳܟ ܘܶܐܬܬܢܺܝܚ: ܘܰܡܫܰܡܶܫ ܐܰܢ̱ܬ ܠܗܽܘܢ ܐܰܝܟ ܡܶܠܬܳܟ ܐܶܘܰܢܓܶܠܳܝܬܳܐ ܟܰܕ ܠܬܶܫܡܫܬܳܟ ܩܰܕܺܝܫܬܳܐ ܘܐܰܠܳܗܳܝܬܳܐ ܓܒ̣ܰܝܬ ܘܚܰܘܺܝܬ ܐܶܢܽܘܢ: ܘܰܐܩܺܝܡܬ ܐܶܢܽܘܢ ܩܕܳܡܰܝܟ ܕܕܰܟܝܳܐܝ̣ܬ ܘܩܰܕܺܝܫܳܐܝ̣ܬ ܢܫܰܡܫܽܘܢܳܟ: ܘܶܐܬܬܢܺܝܚ ܒܗܽܘܢ ܨܶܒܝܳܢ ܐܰܒܽܘܟ ܡܫܰܒܚܳܐ: ܘܰܐܟܡܳܐ ܕܰܛܥܶܢܘ̱ ܢܺܝܪܳܟ ܩܰܠܺܝܠܐܴ ܘܰܡܝܰܩܪܳܐ ܥܰܠ ܟܰܬܦ̈ܳܬܗܽܘܢ: ܘܰܐܙܥܶܩܘ̱ ܩ̈ܳܠܐܷ ܚܠܰܝ̈ܳܐ ܟܰܕ ܡܰܘܕܶܝܢ ܠܛܰܝܒܽܘܬܳܟ ܠܐܴ ܢܰܙܥܩܽܘܢ ܒܓܰܘ ܓܺܗܰܢܳܐ ܩܳܠܷ̈ܐ ܕܳܘܱ̈ܝܳܐ ܡܰܠܝ̈ܰܝ ܚܶܢ̈ܓܳܬܳܐ: ܘܠܐܴ ܬܶܬܕܟܰܪ ܠܗܽܘܢ ܡܳܪܝܳܐ ܡܰܗܡܝܳܢܽܘܬܳܐ ܗܳܝ ܕܰܒܬܶܫܡܫܬܳܐ ܕܺܝܠܗܽܘܢ ܩܕܳܡܰܝܟ ܐܶܠܐܴ ܥܰܡ ܩܪ̈ܰܝܳܐ ܘܰܙܡܺܝ̣̈ܢܶܐ ܕܡܶܫܬܽܘܬܳܟ ܚܰܕܳܐ ܐܶܢܽܘܢ: ܘܥܰܡ ܓܒܰܝ̈ܳܐ ܕܺܝܠܳܟ ܩܕܳܡ ܬܪܽܘܢܳܘܣ ܕܐܰܠܳܗܽܘܬܳܟ ܐܰܩܺܝܡ ܐܶܢܽܘܢ: ܘܢܶܬܬܢܺܝܚ ܨܶܒܝܳܢܳܟ ܒܦܺܝܪ̈ܡܶܐ ܕܰܩܕܳܡܰܝܟ ܩܰܪܶܒܘ̱ ܒܚܰܝܰܝ̈ܗܽܘܢ ܘܢܶܥܠܽܘܢ ܠܓܘ ܡܰܕܒܚܳܟ ܫܡܰܝܳܢܳܐ ܠܰܩܕܳܡ ܒܺܐܡܰܐ ܕܺܝܠܳܟ ܓܢܺܝܙܬܳܐ: ܘܰܢܫܰܒܚܽܘܢܳܟ ܒܰܓܢܽܘܢܳܟ ܥܰܡ ܡܫܰܡ̈ܫܳܢܶܐ ܕܰܥܒ̣ܰܕܘ ܨܶܒܝܳܢܳܟ: ܚܽܘܪ ܡܳܪܝ̱ ܒܬܶܫܡܫܬܗܽܘܢ ܕܥܰܠ ܐܺܝܕܰܝ̈ܗܽܘܢ ܩܰܕܺܝ̈ܫܳܬܳܐ ܙܰܝܚܽܘܟ: ܘܰܠܥܰܡܳܟ ܙܰܡܶܢ ܠܡܰܠܟܽܘܬܳܟ ܕܒܰܕܡܳܟ ܩܰܕܺܝܫܳܐ ܚ̣ܬܰܡܘ̱ ܠܣܶܦܘ̈ܳܬܗܽܘܢ ܚܰܣܳܐ ܡܳܪܝ̱ ܚܰܘܒܰܝ̈ܗܽܘܢ ܘܰܫܒܽܘܩ ܚܛܳܗܰܝ̈ܗܽܘܢ: ܘܚܰܕܳܐ ܐܶܢܽܘܢ ܒܰܚܙܳܬܳܟ ܡܰܦܨܚܳܢܺܝܬܳܐ ܘܠܐܴ ܬܶܬܥ̱ܰܗܰܕ ܠܗܽܘܢ ܡܚܺܝ̣̈ܠܘܳܬܳܐ ܕܡܶܢܗܽܘܢ ܐܶܫܬܰܡܰܫ̈ܝ̱: ܘܰܗܘܺܝ ܠܗܽܘܢ ܡܳܪܝܳܐ ܠܶܘܝܳܐ ܛܳܒܳܐ ܘܡܰܢܰܥ ܐܶܢܽܘܢ ܠܐܱܬܪܳܐ ܕܚܰܕ̈ܘܳܬܳܐ ܘܕܰܕܝܳܨܳܐ: ܘܥܰܡ ܟܳܗ̈ܢܶܐ ܕܟܰܝ̈ܳܐ ܘܰܡܕܰܝ̈ܠܳܢܶܐ ܕܫܰܡܫܽܘܟ ܟܽܠ ܝܰܘ̈ܡܰܝ ܚܰܝܰܝ̈ܗܽܘܢ ܒܕܰܟܝܽܘܬܳܐ ܢܫܰܒܚܽܘܢܳܟ ܘܥܰܡ ܡܫܰܡ̈ܫܳܢܶܐ ܕܟܰܝ̈ܳܐ ܘܰܙܗܰܝ̈ܳܐ ܘܶܐܣـܛܶـܦܰـܢـܘ̈ܣܳܝܶܐ ܕܰܫܦ̣ܰܪܘ̱ ܢܗܰܠܠܽܘܢ ܠܳܟ ܒܚܰܕܽܘܬܳܐ ܠܳܐ ܡܶܫܬܰܪܝܳܢܺܝܬܳܐ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀