ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܡܰܠܟܳܐ ܕܪܰܘܡܳܐ ܕܶܐܬܡܰܟܰܟ ܒܨܶܒܝܳܢܶܗ ܘܰܠܒܶܫ ܕܡܽܘܬܰܢ: ܘܰܣܠܶܩ ܠܰܨܠܺܝܒܳܐ ܒܝܰܕ ܚܽܘܒܶܗ ܕܢܶܓܡܽܘܪ ܦܽܘܪܩܳܢܰܢ ܘܒܰܦܫܳܛܳܐ ܕܺܐܝ̈ܕܰܘܗ̱ܝ ܕܒܰܙܩܺܝܦܳܐ ܠܟܽܠܗܽܘܢ ܦܶܢ̈ܝܳܬܳܐ ܢܓܰܕ ܘܰܐܝ̣ܬܝ ܠܣܶܓܕܬܶܗ: ܘܢܶܬܒܰܩܽܘܢ ܒܚܰܫܶܗ ܘܢܶܬܡܰܙܓܽܘܢ ܒܚܽܘܒܶܗ ܘܢܶܫܬܽܘܢ ܡ̣ܶܢ ܚܰܡܪܶܗ: ܘܰܢܡܽܘܬܽܘܢ ܒܡܰܘܬܶܗ ܘܢܶܬܩܰܒܪܽܘܢ ܥܰܡܶܗ ܘܰܢܩܽܘܡܽܘܢ ܥܰܡܶܗ: ܘܢܰܡܠܟܽܘܢ ܒܫܽܘܒܚܶܗ ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܝܽܘܡ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܘܗ̱ܝ ܘܰܒܟܽܠܗܽܘܢ ܝܰܘ̈ܡܳܬܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܳܪܝܳܐ ܟܰܣܝܳܐ ܘܰܓܢܝ̣ܙܳܐ ܘܠܳܐ ܡܶܬܚܰܙܝܳܢܳܐ: ܨܶܡܚܳܐ ܕܐܰܒܳܐ ܘܫܘ̣ܒܚܳܐ ܕܝܳܠܘ̣ܕܶܗ ܡܰܠܟܶܗ ܕܺܐܝܣܪܳܐܝܶܠ ܚܰܕܬܳܐ ܘܐܰܠܳܗܳܐ ܕܟܽܠ ܒܶܪ̈ܝܳܢ ܡܰܥ̱ܗܕܺܝܢܰܢ ܩܕܳܡܰܝܟ ܡܳܪܝܳܐ ܒܝܰܘܡܳܐ ܗܳܢܳܐ ܕܩܳܐܶܡ ܠܟܽܠܳܗ̇ ܐܶܣܦܺܝܪ ܕܩܰܕܺܝ̈ܫܶܐ: ܘܰܐܒܳܗ̈ܳܬܳܐ ܟܺܐܢ̈ܶܐ ܘܙܰܕܺܝ̈ܩܶܐ ܕܪܰܚܡܽܘܟ ܗܳܢܽܘܢ̇ ܕܡܶܢ ܥܳܠܰܡ ܥܰܠ ܣܰܒܪܳܐ ܫܰܪܝ̣ܪܳܐ ܕܰܩܝܳܡܬܳܟ ܡܫܰܒܰܚܬܳܐ ܫܟܶܒܘ̱: ܗܳܕܶܐ ܕܒܳܗ̇ ܟܽܠܗܽܘܢ ܐܰܝܠܶܝܢ ܕܗܰܝܡܶܢܘ̱ ܒܳܟ ܒܽܘܝܳܐܳܐ ܩܢܰܘ ܡ̣ܶܢ ܐܽܘܠܨܳܢܰܝ̈ܗܽܘܢ: ܘܒܳܗ̇ ܬܽܘܒ ܐ̱ܪ̈ܳܙܰܝܗܽܘܢ ܘܦ̈ܶܠܐܴܬܗܽܘܢ ܐܶܬܓܡܰܪܘ̱ ܘܶܐܫܬܰܡܠܺܝܘ: ܘܥܰܡܗܽܘܢ ܕܶܝܢ ܠܓܘ̣ܕܳܐ ܫܒܝ̣ܚܬܳܐ ܕܰܫܠܝ̣̈ܚܶܐ ܘܰܠܟܶܢܫܳܐ ܗܰܘ ܢܰܨܝ̣ܚܳܐ ܕܣܳܗ̈ܕܶܐ ܘܡܰܘܕ̈ܝܳܢܶܐ: ܕܡܶܛܽܠܳܬܳܟ ܣܰܝܒܰܪܘ̱ ܟܽܠ ܚܰܫܺܝ̈ܢ ܘܫܶܢܕܺܝ̈ܢ ܘܠܐܴ ܦܰܕܘ̱ ܡ̣ܶܢ ܫܪܳܪܳܟ: ܘܰܗ̣ܘܰܘ ܕܽܘܡܝܳܐ ܘܡܰܚܙܺܝܬܳܐ ܠܣܰܓܺܝ̈ܶܐܐ ܕܢܶܪܕܽܘܢ ܒܳܬܰܪ ܙܩܺܝܦܽܘܬܳܟ ܡܰܥܒܕܰܬ݀ ܚܰܝ̈ܶܐ: ܝܰܘܡܳܢܳܐ ܐܳܕܳܡ ܘܚܰܘܳܐ ܪܳܘܙܝ̣ܢ ܒܚܰܕܽܘܬܳܐ ܕܩܳܡܘ̱ ܡ̣ܶܢ ܡܰܦܽܘܠܬܗܽܘܢ: ܘܰܒܨܶܨ̈ܰܝܟ ܐܶܬܬܰܠܰܚ ܐܶܫܛܳܪ ܚܰܘ̈ܒܳܬܗܽܘܢ: ܘܒܰܨܠܺܝܒܳܟ ܐܶܬܥܰܛܝܰܬ݀ ܠܰܘܛܰܬܗܽܘܢ: ܝܰܘܡܳܢܳܐ ܗܳܒܶܝܠ ܚܳܕܶܐ ܒܰܕܡܳܟ ܝܰܩܺܝܪܳܐ ܕܙܰܟܺܝ ܠܰܕܡܶܗ: ܝܰܘܡܳܢܳܐ ܢܽܘܚ ܪܳܘܶܙ ܕܒܰܕܡܳܐ ܘܡܰܝ̈ܳܐ ܕܰܪܕܰܘ ܡ̣ܶܢ ܕܰܦܢܳܟ ܐܰܛܺܝܦܘ̱ ܠܰܚܛܺܝܬܳܐ ܕܟܽܠܶܗ ܥܳܠܡܳܐ: ܝܰܘܡܳܢܳܐ ܡܰܠܟܺܝܙܕܶܩ ܕܳܐܶܨ ܒܫܽܘܡܠܳܝ ܐ̱ܪ̈ܳܙܰܘܗ̱ܝ ܕܠܰܚܡܳܐ ܘܚܰܡܪܳܐ ܐܰܫܠܶܡܬ ܠܥܺܕܬܳܟ ܐ̱ܪܳܙ ܦܰܓܪܳܟ ܘܰܕܡܳܟ ܩܰܕܺܝܫܳܐ ܕܒܶܗ ܬܺܚܶܐ: ܝܰܘܡܳܢܳܐ ܐܰܒܪܳܗܳܡ ܢܳܨܰܚ ܘܡܶܬܦܨܰܚ ܕܠܳܟ ܐܶܡܪܳܐ ܕܐܰܠܳܗܽܘܬܳܐ ܚܙܳܐ ܕܰܬܠܶܝܬ ܒܰܙܩܺܝܦܳܐ ܘܰܚܠܳܦ ܟܽܠܶܗ ܥܳܠܡܳܐ ܡܶܬܕܰܒܚܰܬ: ܝܰܘܡܳܢܳܐ ܐܺܝܣܚܳܩ ܡܰܘܕܶܐ ܕܰܚܙܳܟ ܕܒܰܦܟܳܪ̈ܰܝܟ ܐܶܫܬܪܺܝ ܥܳܠܡܳܐ ܟܽܠܶܗ ܡ̣ܶܢ ܐܰܣܽܘܪ̈ܶܐ ܕܡܰܘܬܳܐ ܘܕܰܚܛܺܝܬܳܐ: ܝܰܘܡܳܢܳܐ ܝܰܥܩܽܘܒ ܡܫܰܒܰܚ ܕܰܚܙܳܟ ܥܰܠ ܪܺܝܫ ܩܰܝܣܳܐ ܘܰܡܨܰܒܰܥ ܓܽܘܫܡܳܟ ܐܰܝܟ ܕܰܒܚܰܡܪܳܐ: ܝܰܘܡܳܢܳܐ ܝܰܘܣܶܦ ܡܪܰܡܪܶܡ ܕܐܶܬܓܡܰܪܘ̱ ܚܰܫܰܝ̈ܟ ܘܰܐܡܠܶܟܬ ܥܰܠ ܟܽܠܳܗ̇ ܛܽܘܥܝܰܝ ܘܰܚܛܺܝܬܳܐ: ܝܰܘܡܳܢܳܐ ܡܽܘܫܶܐ ܡܝܰܒܶܒ ܒܰܦܫܳܛܳܐ ܕܺܐܝܕܰܝ̈ܟ ܥܰܠ ܩܰܝܣܳܐ ܕܰܣܚܰܦܬ ܠܰܥܡܳܠܺܝܩ ܡܶܬܝܰܕܥܳܢܳܐ ܘܰܠܟܽܠܳܗ̇ ܡܰܫܪܺܝܬܶܗ ܘܦܰܟܰܗܬ ܠܡܶܪܬܶܗ ܕܬܰܢܺܝܢܳܐ ܥܰܬܺܝܩܳܐ: ܘܰܠܡܰܪܺܝܪܽܘܬܳܐ ܕܥܰܡ̱̈ܡܶܐ ܚܰܠܺܝܬ ܘܰܠܟܽܠܗܽܘܢ ܐܰܚܺܝܬ ܒܰܨܠܺܝܒܳܟ: ܝܰܘܡܳܢܳܐ ܐܰܗܪܽܘܢ ܟܳܗܢܳܐ ܒܪܺܝܚ ܕܶܒܚܳܟ ܡܶܬܒܰܣܰܡ ܕܒܶܗ ܐܶܬܟܠܺܝ ܡܰܘܬܳܢܳܐ ܕܰܚܛܺܝܬܳܐ ܡ̣ܶܢ ܬܺܒܶܝܠ: ܝܰܘܡܳܢܳܐ ܦܺܝܢܚܶܣ ܛܰܢܳܢܳܐ ܡܰܘܕܶܐ ܕܰܒܚܽܘܛܪܶܗ ܕܰܨܠܺܝܒܳܟ ܩܛܰܠܬ ܠܰܚܛܝ̣ܬܳܐ ܘܰܠܒܺܝܫܳܐ ܘܡܰܘܬܳܐ ܘܰܠܛܘ̣ܥܝܰܝ : ܘܰܟܠܰܝܬ ܠܫܽܘܠܛܳܢܶܗ ܕܡܰܘܬܳܐ ܡ̣ܶܢ ܟܽܠܳܗ̇ ܒܪܺܝܬܳܐ: ܝܰܘܡܳܢܳܐ ܝܶܫܽܘܥ ܒܰܪܢܽܘܢ ܡܩܰܠܶܣ ܕܰܒܝܰܕ ܢܰܝܙܟܶܗ ܕܰܨܠܺܝܒܳܟ ܐܰܚܪܶܒܬ ܠܰܫܝܽܘܠ ܠܕܳܪܕܳܪ̈ܺܝܢ ܘܓܰܢ̱ܒܳܪ̈ܶܐ ܕܺܝܠܳܗ̇ ܐܰܘܒܶܕܬ ܘܰܠܥܰܡܳܐ ܕܺܝܠܳܟ ܠܐܘܪܫܠܶܡ ܥܶܠܳܝܬܳܐ ܫܰܕܰܪܬ: ܝܰܘܡܳܢܳܐ ܕܰܘܺܝܕ ܡܙܰܡܰܪ ܕܰܒܝܰܕ ܗܳܕܶܐ ܟܽܠܗܶܝܢ ܙܡܺܝܪ̈ܳܬܶܗ ܐܝ̣ܬܝܬ ܠܫܽܘܡܠܳܝܳܐ ܗܳܐ ܒܶܝܬ ܡܝ̣̈ܬܶܐ ܒܰܪ ܚܺܐܪ̈ܶܐ ܐܰܝܟ ܩܛܺܝ̈ܠܐܶ ܕܰܫܟܝ̣ܒܝ̣ܢ ܒܩܰܒܪ̈ܶܐ ܐܶܬܚܒܶܫܬ ܘܩܳܡܬ ܕܠܐܴ ܚܒܳܠܐܴ ܘܒܰܕܰܪܬ ܠܟܽܠܗܘܢ̇ ܒܥܶܠܕ̈ܒܳܒܰܝܟ: ܝܰܘܡܳܢܳܐ ܐܶܫܰܥܝܳܐ ܡܶܬܕܰܡܰܪ ܕܰܚܙܳܟ ܕܶܐܬܕܒܰܪܬ ܐܰܝܟ ܐܶܡܪܳܐ ܠܢܶܟܣܬܳܐ: ܘܰܛܥܶܢܬ ܚܰܫܰܝ̈ܢ ܟܽܠܶܗ ܝܰܘܡܳܢܳܐ: ܘܰܕܝܰܗܒ ܦܺܝܠܰܛܳܘܣ ܩܰܒܪܳܟ ܘܢܰܚ̈ܬܰܝܟ ܕܰܡܦܰܠܦܠܺܝܢ ܒܰܕܡܳܐ ܕܰܩܢܽܘܡܳܟ: ܝܰܘܡܳܢܳܐ ܙܟܰܪܝܳܐ ܬܳܗܰܪ ܕܰܚܙܳܐ ܫܽܘ̈ܡܳܬܳܐ ܕܺܐܝ̈ܕܰܝܟ ܘܪ̈ܶܓܠܰܝܟ: ܘܡܺܝܟܳܐ ܡܰܟܪܶܙ ܕܰܚܙܳܟ ܕܶܐܬܕܩܰܪܬ ܒܠܽܘܟܳܝܬܳܐ ܘܥܰܡܽܘܣ ܒܫܶܡܫܳܐ ܕܰܚܫܶܟ ܒܛܰܗܪܳܐ: ܝܰܘܡܳܢܳܐ ܝܰܘܢܳܢ ܢܒܺܝܳܐ ܣܳܓܶܕ: ܕܰܫܟܶܒܬ ܐܰܝܟ ܡܺܝܬܳܐ ܒܰܫܝܽܘܠ ܘܠܰܬܠܳܬܳܐ ܝܰܘ̈ܡܺܝܢ ܩܳܡܬ ܘܰܠܥܺܕܬܳܐ ܡܟܺܝܪܬܳܟ ܒܰܪ̱ܬ ܥܰܡ̱̈ܡܶܐ ܚܰܕܺܝܬ: ܝܰܘܡܳܢܳܐ ܗܽܘܫܳܥ ܡܰܗܶܠ ܒܡܰܘܬܳܐ ܘܒܰܫܝܽܘܠ ܕܰܫܩܰܠܬ ܥܠܰܝܗܽܘܢ ܙܳܟܽܘܬܳܐ ܒܰܨܠܺܝܒܳܟ ܘܰܩܝܳܡܬܳܟ: ܝܰܘܡܳܢܳܐ ܟܽܠܗܽܘܢ ܢܒܺܝ̈ܶܐ ܬܰܘܕ̈ܝܳܬܳܐ ܦܳܪܥܺܝܢ: ܘܰܫܠܺܝ̈ܚܶܐ ܘܰܡܣܰܒܪ̈ܳܢܶܐ ܣܰܒܪܳܐ ܘܚܰܝ̈ܶܐ ܡܣܰܒܪܺܝܢ: ܘܣܳܗ̈ܕܶܐ ܘܡܰܘܕ̈ܝܳܢܶܐ ܚܰܫ̈ܶܐ ܘܫܶܢ̈ܕܶܐ ܕܰܣܒܰܠܘ̱ ܗܰܕܳܡܰܝ̈ܗܽܘܢ: ܒܰܕܡܳܐ ܚܰܣܝܳܐ ܕܡ̣ܶܢ ܨܰܘܪ̈ܰܝܗܽܘܢ ܪܽܘܡܝܳܢܳܐ ܡܩܰܪܒܺܝܢ: ܘܰܟܠܺܝܠ ܣܶܓܕ̈ܳܬܳܐ ܠܪܺܝܫܳܟ ܡܝܰܩܪܳܐ ܓܳܕܠܺܝܢ: ܘܠܰܩܝܳܡܬܳܟ ܡܫܰܒܰܚܬܳܐ ܡܚܰܓܶܝܢ ܘܰܡܥܰܕܥܕܺܝܢ: ܘܥܰܡ ܗܳܠܶܝܢ ܘܰܩܕܳܡ ܗܳܠܶܝܢ ܡܶܬܥ̱ܰܗܕܺܝܢܰܢ ܒܝܰܘܡܳܐ ܗܳܢܳܐ ܩܰܕܺܝܫܳܐ ܠܰܒܬܽܘܠܬܳܐ ܩܰܕܺܝܫܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܗܳܝ ܕܺܝܠܶܕܬܳܟ ܒܬܶܕܡܽܘܪܬܳܐ ܘܰܒܬܽܘ̈ܠܶܝܗ̇ ܠܐܴ ܫܪܰܝܬ: ܗܳܝ ܕܒܰܨܠܰܘ̈ܳܬܳܗ̇ ܕܰܟܝ̈ܳܬܳܐ ܘܰܕܟܽܠܗܽܘܢ ܩܰܕܺܝ̈ܫܶܐ ܕܡ̣ܶܢ ܥܳܠܰܡ ܫܦܰܪܘ̱ ܠܳܟ ܡܦܺܝܣܺܝܢܰܢ ܠܳܟ: ܝܺܕܺܝܥܳܐܝ̣ܬ ܕܶܝܢ ܕܝܽܘܚܰܢܳܢ ܡܰܥܡܕܳܢܳܐ ܕܪܰܒܽܘܬܳܟ: ܘܕܶܐ̱ܣܛܶܦܰܢܳܘܣ ܒܽܘܟܪܳܐ ܕܣܳܗܕܽܘܬܳܐ ܘܰܡܕܰܡܝܳܢܳܐ ܕܒܳܟ: ܘܦܶܛܪܽܘܣ ܪܺܝܫܳܐ ܕܰܫܠܺܝܚܽܘܬܳܐ ܘܫܶܬܶܐܣܬܳܐ ܕܥܺܕܬܳܐ: ܘܰܕܝܽܘܚܰܢܳܢ ܒܬܘ̣ܠܳܐ ܗܰܘ ܕܰܐܓܶܣ ܥܰܠ ܚܰܕܝܳܟ ܒܰܚܫܳܡܺܝܬܳܐ: ܘܰܕܦܰܘܠܳܘܣ ܟܳܪܽܘܙܳܐ ܕܗܰܝܡܳܢܽܘܬܳܐ ܫܰܪܺܝܪܬܳܐ ܘܰܡܒܰܢܝܳܢܳܐ ܕܰܣܚܝ̣̈ܦܳܬܳܐ ܕܥܺܕܰܬ݀ ܩܘ̣ܕܫܳܐ ܒܰܪ̱ܬ݀ ܐܰܪ̈ܡܳܝܶܐ: ܘܕܰܐܪܒܥܳܐ ܐܶܘܰܢܓܶܠܝ̣̈ܣܛܶܐ ܢܽܘܗܪܳܐ ܫܒܝ̣ܚܳܐ ܕܡܶܬܥܰܡܪܳܢܝ̣ܬܳܐ: ܘܰܕܝܰܥܩܽܘܒ ܙܰܕܝ̣ܩܳܐ ܘܐܰܚܳܐ ܕܺܝܠܳܟ ܒܛܰܝܒܽܘܬܳܐ ܘܒܰܪ ܝܰܘܣܶܦ: ܘܰܕܟܽܠܗܽܘܢ ܐܰܒ̈ܳܗܳܬܳܐ ܘܡܰܠܦܳܢ̈ܶܐ ܬܪ̈ܺܝܨܰܝ ܫܽܘܒܚܳܐ: ܘܕܰܐܪܒܥܺܝܢ ܣܳܗ̈ܕܶܐ ܩܰܕܝ̣̈ܫܶܐ ܕܐܰܣܗܶܕܘ̱ ܒܝܰܡܬܳܐ ܕܣܶܒܰܣܛܺܝܰܐ: ܘܰܕܟܽܠܗܽܘܢ ܡܰܘܕܝ̈ܳܢܶܐ ܬܪ̈ܺܝܨܶܐ: ܘܰܕܩܰܕܺܝܫܳܐ ܡܳܪܝ̱ ܡܰܬܰܝ ܘܚܰܒܪ̈ܰܘܗܝ: ܘܰܕܡܳܪܝ̱ ܒܶܗܢܰܡ ܘܣܰܪܳܐ ܚܳܬܶܗ ܘܰܕܣܺܝܥܬܶܗ ܢܰܨܺܝܚܬܳܐ: ܐܰܫܪܳܐ ܫܰܝܢܳܟ ܘܰܫܠܳܡܳܟ ܒܥܳܡܰܪܬܳܐ ܙܒܺܝܢܰܬ݀ ܒܰܕܡܳܟ ܝܰܩܺܝܪܳܐ: ܘܒܰܛܶܠ ܡ̣ܶܢ ܥܺܕܬܳܟ ܙܒܝ̣ܢܰܬ݀ ܒܰܕܡܳܟ ܝܰܩܝ̣ܪܳܐ ܣܶܕ̈ܩܶܐ ܘܚܶܪ̈ܝܳܢܶܐ ܘܟܽܠܗܶܝܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ ܘܥܰܕܰܪ ܠܪ̈ܳܥܰܘܳܬܳܐ ܒܩܳܝܘ̣ܡܘ̣ܬܳܐ ܕܡܶܢܳܟ: ܘܢܰܛܰܪ ܠܪ̈ܳܥܰܘܳܬܳܐ ܘܪ̈ܝ̣ܫܰܝ ܟܳܗ̈ܢܶܐ ܕܪܳܥܶܝܢ ܠܳܗ̇ ܒܩܰܕܝ̣ܫܘ̣ܬܳܐ ܘܰܕܠܳܐ ܥܶܕܠܳܝ ܘܰܠܟܳܗ̈ܢܶܝܗ̇ ܘܠܰܡܫܰܡ̈ܫܳܢܶܝܗ̇ ܪܰܡܪܶܡ ܐܝ̣ܩܳܪܗܘܢ̇ ܩܕܳܡ ܐܰܠܳܗܘ̣ܬܳܟ: ܘܰܐܘܪܶܒ ܘܢܰܛܰܪ ܘܣܰܬܰܪ ܐܶܢܽܘܢ ܘܰܠܟܽܠܶܗ ܡܽܘܠܳܝܳܐ ܕܥܺܕܬܳܐ ܕܺܝܠܳܟ ܬܚܶܝܬ ܟܶܢ̈ܦܰܘܗ̱ܝ ܕܰܨܠܺܝܒܳܟ ܡܝܰܩܪܳܐ ܡ̣ܶܢ ܟܽܠ ܒܺܝܫܳܐ ܡܰܟܝܳܢܳܐ: ܘܚܰܣܳܐ ܚܰܘ̈ܒܶܐ ܕܡܰܣܟ̈ܠܳܢܶܐ ܒܰܚܢܳܢܳܟ: ܘܰܐܣܳܐ ܘܰܐܚܠܶܡ ܠܰܟܪ̈ܺܝܗܶܐ ܘܠܐܱܠܺܝ̈ܨܶܐ ܒܛܰܝܒܽܘܬܳܟ: ܘܦܰܢܳܐ ܫ̈ܶܐܠܳܬܳܐ ܫܰܦܺܝܪ̈ܳܬܳܐ ܕܟܽܠ ܕܩܳܪܶܐ ܠܳܟ: ܘܠܐܱܝܠܶܝܢ ܕܫܶܐܠܘ̱ ܘܫܳܐܠܺܝܢ ܨܠܰܘ̈ܳܬܳܐ ܕܰܒܨܝ̣ܪܘ̣ܬܰܢ: ܥܢܺܝ ܘܥܰܕܰܪ ܒܰܡܪܰܚܡܳܢܽܘܬܳܟ ܘܰܐܢܺܝܚ ܠܥܰܢܺܝ̈ܕܶܐ ܕܰܫܟܶܒܘ̱ ܥܰܠ ܣܰܒܪܳܟ ܘܒܰܣܶܡ ܐܶܢܘܢ̇ ܒܰܓܢܽܘܢܳܐ ܕܡܰܠܟܽܘܬܳܟ ܥܰܡ ܟܽܠܗܘܢ̇ ܐܰܝܠܶܝܢ ܕܗܰܝܡܶܢܘ̱ ܘܐܰܘܕܺܝܘ ܒܳܟ: ܐܰܝܟܰܢܳܐ ܕܰܚܢܰܢ ܘܗܶܢܽܘܢ̇ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ: ܗܳܫܳܐ܀