ܨܠܽܘܬܳܐ ܕܫܽܘܪܳܝܳܐ

ܓܰܢ̱ܒܳܪܳܐ ܕܩܳܡ ܡܶܢ ܩܰܒܪܳܐ ܒܙܳܟܽܘܬܳܐ ܘܰܫܪܳܐ ܫܽܘܠܛܳܢܶܗ ܕܡܰܘܬܳܐ ܥܰܙܺܝܙܳܐ ܕܰܓܣܰܪ ܒܗܳܡܳܢ ܘܶܐܬܦܪܶܬܘ̱ ܥܽܘ̈ܒܶܝܗ̇: ܓܽܘܪܝܳܐ ܕܰܐܪܝܳܐ ܕܡܰܘܬܶܗ ܩܰܛܠܶܗ ܠܡܰܘܬܳܐ ܩܳܛܽܘܠܰܢ: ܡܰܘܕܶܝܢܰܢ ܠܳܟ ܡܳܪܝ̱ ܘܠܰܩܝܳܡܬܳܟ ܒܪܺܝܟܬܳܐ ܕܡܶܢ ܒܶܝܬ ܡܺܝ̈ܬܶܐ ܡܫܺܝܚܳܐ ܣܰܒܪܳܐ ܕܥܺܕܬܶܗ ܘܦܳܪܽܘܩܳܐ ܕܢܰܦ̈ܫܳܬܰܢ: ܥܰܡ ܐܰܒܽܘܟ ܘܪܽܘܚܳܟ ܩܰܕܺܝܫܳܐ ܗܳܫܳܐ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܟܺܐܢܳܐ ܘܰܬܪܺܝܨܳܐ ܕܒܰܕܰܪ ܒܟܺܐܢܽܘܬܶܐ ܕܺܝܠܶܗ ܠܙܳܩܽܘ̈ܦܐ: ܘܰܒܛܰܝܒܽܘܬܶܗ ܟܰܢܶܫ ܠܚܰܒܺܝ̈ܒܰܘܗ̱ܝ: ܠܗܰܘ ܚܰܟܺܝܡܳܐ ܕܰܠܥܽܘܫܢܳܐ ܕܥܰܫܺܝ̈ܢܶܐ ܫܳܛ ܒܰܡܚܺܝܠܽܘܬܶܗ: ܘܩܰܦܰܚ ܠܪܳܡܽܘܬܳܐ ܒܡܰܟܺܝܟܽܘܬܶܗ: ܘܣܰܚܶܦ ܟܽܘܪܣܝܳܐ ܕܗܳܢܘܢ̇ ܬܠܳܬܳܐ ܒܥܶܠܕ̈ܒܳܒܶܐ ܒܰܩܝܳܡܬܶܗ ܘܬܰܒܰܪ ܬܰܪ̈ܥܶܐ ܕܰܫܝܽܘܠ ܒܬܰܩܺܝܦܽܘܬܶܗ ܘܰܐܦܶܩ ܠܥܰܢܺܝ̈ܕܶܐ ܡܶܢ ܚܶܫܽܘܟܳܐ ܕܠܶܗ ܝܳܐܶܐ ܫܽܘܒܚܳܐ ܘܐܝ̣ܩܳܪܳܐ ܒܗܳܢܳܐ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܕܰܒܚܰܝܠܶܗ ܬܰܩܺܝܦܳܐ ܐܶܬܬܰܩܰܢ̈ܝ̱ ܒܶܪ̈ܝܳܬܳܐ: ܘܰܒܪܶܡܙܳܐ ܕܨܶܒܝܳܢܶܗ ܡܕܰܒܰܪ ܠܣܰܘ̈ܦܶܐ ܘܦܶܢ̈ܝܳܬܳܐ: ܗܰܘ ܕܰܒܝܰܡܳܐ ܕܛܳܒܽܘܬܶܗ ܬܡܺܝܗܬܳܐ ܫܰܡܠܺܝ ܐ̱ܪܳܙܳܐ ܕܰܡܕܰܒܪܳܢܽܘܬܳܐ ܕܺܝܠܶܗ ܦܳܪܽܘܩܳܝܬܳܐ: ܘܡܺܝܬ ܐܰܝܟ ܕܰܨܒܳܐ ܘܶܐܬܢܰܚܰܡ ܐܰܝܟ ܕܰܫܦܰܪ ܠܶܗ: ܟܰܕ ܠܰܒܥܶܠܕ̈ܒܳܒܶܐ ܬܠܳܬܳܐ ܐܰܘܒܶܕ ܒܰܩܝܳܡܬܶܗ: ܠܣܳܛܳܢܳܐ ܘܠܰܫܝܽܘܠ ܘܰܠܡܰܘܬܳܐ ܘܦܰܨܺܝ ܠܓܶܢܣܰܢ ܕܰܐܒܺܝܕ ܗ̱ܘܳܐ ܒܰܚܛܺܝܬܳܐ: ܘܡܽܘܠܟܳܢ̈ܶܐ ܫܰܪܺܝܪ̈ܶܐ ܝܰܗܒ ܠܰܦܪ̈ܺܝܩܰܘܗ̱ܝ ܕܰܐܝܢܳܐ ܕܰܡܗܰܝܡܶܢ ܘܥܳܡܶܕ ܚܳܝܶܐ ܘܐܰܝܢܳܐ ܕܠܳܐ ܡܗܰܝܡܶܢ ܡܶܬܚܰܝܰܒ: ܘܟܰܕ ܠܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܠܥܺܕ̈ܳܬܳܐ ܘܰܠܕܰܝܪ̈ܳܬܳܐ ܫܰܟܶܢ ܚܰܕܽܘܬܳܐ ܘܰܪܘܳܙܳܐ: ܘܚܰܘܺܝ ܠܟܽܠܗܽܘܢ ܦܪ̈ܺܝܩܶܐ ܘܰܡܚܰܪܪ̈ܶܐ: ܘܒܰܕܓܽܘܢ ܚܘܺܝܚܳܐܝ̣ܬ ܡܩܰܒܠܺܝܢܰܢ ܠܝܰܘܡܳܐ ܗܳܢܳܐ ܕܰܩܝܳܡܬܳܐ ܡܝܰܩܪܺܝܢܰܢ ܘܳܐܡܪܺܝܢܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܐܶܬܰܝ̈ ܠܰܢ ܟܽܠ ܛܳܒ̈ܳܬܳܐ ܫܡܰܝܳܢ̈ܳܝܳܬܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ ܗ̣ܘܰܝܢܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܓܢܽܘܢܳܐ ܒܡܰܠܟܽܘܬܳܐ ܕܰܫܡܰܝܳܐ ܐܶܬܬܰܩܰܢ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܕܢܰܚ ܠܰܢ ܢܽܘܗܪܳܐ ܪܰܒܳܐ ܘܫܰܪܺܝܪܳܐ ܘܰܡܝܰܬܰܪ ܡܶܢ ܫܶܡܫܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܗܘܰܝܢܰܢ ܒܢܰܝ̈ܳܐ ܐܳܦ ܝܳܪ̈ܬܶܐ ܕܡܰܠܟܽܘܬܳܐ ܕܰܫܡܰܝܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܘܰܥܕܳܐ ܕܚܰܝ̈ܶܐ ܕܰܠܥܳܠܰܡ ܐܶܫܬܰܟܰܢ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܙܳܟܽܘܬܳܐ ܡܫܰܡܠܰܝܬܳܐ ܐܶܫܬܰܟܢܰܬ݀ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܚܰܕܽܘܬܳܐ ܡܰܠܝܰܬ݀ ܦܽܘܪ̈ܫܳܢܶܐ ܥܳܦܢܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܛܥܰܝܢܳܗ̇ ܠܡܰܦܽܘܠܬܳܐ ܕܰܥܪܽܘܒܬܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܝܳܗܽܘܒܳܐ ܕܚܰܝ̈ܶܐ ܫܰܟܶܢ ܠܰܢ ܚܰܝ̈ܶܐ ܕܠܐܴ ܣܳܐܒܺܝܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܟܬܰܒ ܠܰܢ ܒܣܶܦܪܳܐ ܕܡܰܠܟܽܘܬܳܐ ܕܰܫܡܰܝܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܠܐܘ̣ܚܕܳܢܶܗ ܕܡܰܘܬܳܐ ܝܰܥܢܳܐ ܫܪܳܐ ܘܒܰܛܶܠ ܦܳܪܽܘܩܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܡܺܝܬ ܒܰܒܣܰܪ ܘܰܚܝܳܐ ܒܪܽܘܚ ܚܰܝܳܐ ܕܠܐܴ ܡܳܐܶܬ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܢܶܫ̈ܶܐ ܩܰܕܺܝ̈ܫܳܬܳܐ ܐܶܣܬܰܒܰܪ̈ܝ̱ ܩܝܳܡܬܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܣܒܰܪܬܳܐ ܒܪܺܝܟܳܬܐ ܕܚܰܝ̈ܶܐ ܚܰܕ̈ܬܶܐ ܕܰܩܝܳܡܬܳܐ ܐܶܬܕܰܢܚܰܬ݀ ܠܰܢ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܥܺܕܬܳܐ ܩܰܕܺܝܫܬܳܐ ܐܶܫܬܰܪܪܰܬ݀ ܒܗܰܝܡܳܢܽܘܬܳܐ ܬܪܺܝܨܬܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܦܳܠܰܚܘ̈ܳܬܳܐ ܕܡܰܠܐܱܟ̈ܶܐ ܩܰܕܺܝ̈ܫܶܐ ܝܰܒܶܒܘ̱ ܨܶܝܕ ܩܰܒܪܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܨܒܳܐ ܡܳܪܳܐ ܕܒܶܪ̈ܝܳܬܳܐ ܕܢܶܬܢܰܚܰܡ ܒܬܶܫܒܽܘܚܬܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܩܳܡ ܡܳܪܰܢ ܡܶܢ ܩܰܒܪܳܐ ܘܰܐܩܺܝܡ ܥܰܡܶܗ ܠܓܶܢܣܳܐ ܕܥܰܦܪ̈ܳܢܶܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܪܰܘܡܳܐ ܘܥܽܘܡܩܳܐ ܩܢܰܘ ܚܰܕܽܘܬܳܐ ܒܰܩܝܳܡܬܶܗ ܕܺܝܚܺܝܕܳܝܳܐ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܒܶܗ ܫܰܕܰܪ ܐܰܠܳܗܳܐ ܛܰܝܒܽܘܬܶܗ ܘܪ̈ܰܚܡܰܘܗ̱ܝ ܠܥܰܡܶܗ ܝܳܪܬܽܘܬܳܐ ܕܺܝܠܶܗ: ܬܳܐ ܒܰܫܠܳܡܳܐ ܝܰܘܡܳܐ ܩܰܕܺܝܫܳܐ ܕܚܰܕ ܒܫܰܒܳܐ ܕܰܩܝܳܡܬܳܐ ܕܶܒܗ ܬܳܓܳܐ ܕܢܽܘܗܪܳܐ ܠܥܺܕܬܳܐ ܩܰܕܺܝܫܬܳܐ ܐܶܬܩܛܰܪ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܰܒܝܰܕ ܪ̈ܰܚܡܰܝܟ ܕܰܒܰܪ ܠܰܢ: ܘܰܒܫܰܝܢܳܟ ܘܒܰܫܠܳܡܳܟ ܗܰܕܳܐ ܠܰܢ: ܘܰܒܪܶܚܡܰܬ݀ ܐ̱ܢܳܫܽܘܬܳܟ ܡܶܢ ܫܰܒ̈ܛܶܐ ܕܪܽܘܓܙܳܐ ܘܡܰܪ̈ܕܘܳܬܳܐ ܫܰܘܙܶܒ ܠܰܢ: ܘܰܐܫܘܳܐ ܠܰܢ ܘܰܠܥܰܢܺܝ̈ܕܰܝܢ ܠܩܰܘܡܳܐ ܕܡܶܢ ܝܰܡܺܝܢܳܟ: ܘܠܐܱܝܠܶܝܢ ܕܫܶܐܠܘ̱ ܘܫܳܐܠܺܝܢ ܨܠܰܘ̈ܳܬܳܐ ܕܰܒܨܺܝܪܽܘܬܰܢ ܠܚܽܘܣܳܝܳܐ ܘܰܠܫܽܘܒܩܳܢܳܐ ܕܚܰܘ̈ܒܶܐ ܘܕܰܚܛܳܗ̈ܶܐ ܘܰܠܩܰܘܡܳܐ ܕܡܶܢ ܝܰܡܺܝܢܳܟ ܘܰܠܫܽܘܒܚܳܐ ܕܪܰܒܽܘܬܳܟ ܘܕܰܐܒܽܘܟ ܘܰܕܪܽܘܚܳܟ ܩܰܕܺܝܫܳܐ ܠܥܳܠܰܡܥܳܠܡܝ̣ܢ ܐܰܡܝ̣ܢ܀

ܥܶܛܪܳܐ

ܡܫܺܝܚܳܐ ܚܰܝܠܐܴ ܕܡܶܢ ܐܰܒܳܐ ܘܥܶܠܬܳܐ ܩܰܕܡܳܝܳܐ: ܗܰܘ ܕܰܠܦܽܘܪܩܳܢܳܐ ܕܓܶܢܣܳܐ ܕܺܝܠܰܢ ܬܰܚܽܘܒܳܐ ܐܶܬܬܰܚܬܺܝ: ܐܰܢ̱ܬ ܡܳܪܝ̱ ܩܰܒܶܠܳܝܗ̱ܝ ܠܦܺܝܪܡܳܐ ܗܳܢܳܐ ܕܩܰܪܶܒܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܰܩܝܳܡܬܳܟ ܡܰܥܒܕܰܬ݀ ܚܰܝ̈ܶܐ: ܘܰܬܪܽܘܨ ܠܠܶܒܰܘ̈ܳܬܳܐ ܠܢܳܛܽܘܪܽܘܬܳܐ ܕܦܽܘܩܕܳܢܰܝ̈ܟ ܩܰܕܺܝ̈ܫܶܐ: ܐܰܢܺܝܚ ܠܥܰܢܺܝ̈ܕܰܝܢ ܡܗܰܝ̈ܡܢܶܐ ܕܰܫܟܶܒܘ̱ ܥܰܠ ܣܰܒܪܳܟ: ܘܰܐܩܺܝܡ ܐܶܢܽܘܢ ܡܶܢ ܝܰܡܺܝܢܳܟ ܡܳܪܰܢ ܘܰܐܠܳܗܰܢ܀

ܚܽܘܬܳܡܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܛܰܝܒܽܘܬܳܟ ܕܰܒܠܶܒܳܐ ܕܰܟܝܳܐ ܢܫܰܒܰܚ ܠܰܩܝܳܡܬܳܟ ܘܰܒܪܶܥܝܳܢܳܐ ܙܰܗܝܳܐ ܢܗܰܕܰܪ ܠܢܽܘܚܳܡܳܟ: ܘܰܒܦܽܘܡܳܐ ܩܰܕܺܝܫܳܐ ܢܩܰܠܶܣ ܠܙܳܟܽܘܬܳܟ ܘܰܒܠܶܫܳܢܳܐ ܫܰܦܝܳܐ ܢܶܫܬܰܥܶܐ ܥܽܘܫܢܳܟ: ܘܥܰܡ ܟܶܢ̈ܫܶܐ ܫܡܰܝ̈ܳܢܶܐ ܢܪܰܡܪܶܡ ܠܐܻܝܩܳܪܳܟ ܘܥܰܡ ܪ̈ܽܘܚܳܢܶܐ ܢܶܣܓܽܘܕ ܠܫܳܠܽܘܚܳܟ ܘܰܢܝܰܒܶܒ ܠܪܽܘܚܳܟ܀