ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܫܒܺܝܚܳܐ ܘܰܡܫܰܒܚܳܐ ܕܰܫܒܺܝܚܳܐܝ̣ܬ ܒܺܐܝܬܽܘܬܶܗ ܐܶܫܬܰܒܰܚ: ܘܡܶܢ ܡܰܠܐܱܟ̈ܶܐ ܘܰܒܢܰܝ̈ܢܳܫܳܐ ܡܶܬܒܰܣ̈ܡܳܢܶܐ ܕܥܰܡܶܗ ܡܶܬܝܰܩܰܪ: ܠܗܰܘ ܬܰܩܺܝܦܳܐ ܘܣܳܥܰܪ ܚܰܝ̈ܠܐܷ ܕܣܰܥܪܳܗ̇ ܠܟܽܠܳܗ̇ ܥܳܡܰܪܬܳܐ ܒܣܳܥܽܘܪܽܘܬܶܗ ܡܰܠܝܰܬ݀ ܟܽܠ ܥܽܘܕܪ̈ܳܢܺܝܢ ܘܟܽܠ ܚܽܘܠܡܳܢ̈ܶܐ ܠܗܰܘ ܪܰܒܳܐ ܕܰܙܥ̣ܰܪ ܠܶܗ ܒܡܶܬܥܰܛܦܳܢܽܘܬܳܐ ܐ̱ܢܳܫܳܝܬܳܐ: ܘܰܠܪ̈ܳܡܶܐ ܘܠܰܚܬܺܝܪ̈ܶܐ ܐܰܝܠܶܝܢ ܕܡܶܫܬܰܥܠܶܝܢ ܗ̱ܘܰܘ ܥܰܠ ܓܶܢܣܰܢ ܫܰܦ̣ܶܠ ܘܕܳܫ ܬܚܶܝܬ ܪ̈ܶܓܠܰܘܗ̱ܝ: ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ ܘܠܳܟ ܣܶܓܕܬܳܐ ܝܰܠܕܳܐ ܝܺܚܺܝܕܳܝܳܐ ܕܰܐܒܳܐ ܓܢܺܝܙܳܐ ܚܕܳܢܳܝܳܐ ܘܰܠܚܽܘܕܳܝܳܐ ܕܒܰܬܠܺܝܬܳܝܽܘܬܳܐ ܕܰܩܢܽܘ̈ܡܶܐ ܩܰܕܺܝ̈ܫܶܐ ܥܺܕܬܳܐ ܩܰܕܺܝܫܬܳܐ ܠܶܗ ܝܳܕܥܳܐ: ܘܒܰܬܠܺܝܬܳܝܽܘܬܳܐ ܣܓܺܝܕܬܳܐ ܚܰܕ ܐܰܠܳܗܳܐ ܫܰܪܺܝܪܳܐ: ܕܒܰܚܕܳܐ ܐܠܰܗܽܘܬܳܐ ܡܪܰܝܰܡܬܳܐ: ܕܒܰܚܕܳܐ ܐܽܘܣܺܝܰܐ: ܘܒܰܚܕܳܐ ܡܰܥܒܕܳܢܽܘܬܳܐ ܡܰܘܕܝܳܐ: ܘܠܰܚܒܺܝܟܽܘܬ ܪܒܺܝܥܳܝܽܘܬܳܐ ܕܰܩܢܽܘ̈ܡܶܐ ܕܳܚ̇ܩܳܐ ܠܟܽܠ ܥܳܫܽܘ̈ܩܶܐ ܘܒܳܨܽܘ̈ܝܶܐ ܘܚܶܪ̈ܝܳܝܶܐ ܙܳܢ̇ܩܳܐ: ܟܰܕ ܠܐܱܒܳܐ ܝܳܠܽܘܕܳܐ: ܘܠܰܒܪܳܐ ܝܺܠܺܝܕܳܐ ܘܰܠܪܽܘܚܳܐ ܢܳܦܽܘܩܳܐ ܡܶܫܬܰܘܕܥܳܐ ܘܠܐܱܒܳܐ ܕܰܐܒܳܐ ܐ̱ܚܪܺܢܳܐ ܠܰܝܬ ܠܶܗ: ܘܠܰܒܪܳܐ ܕܰܒܪܳܐ ܐ̱ܚܪܺܢܳܐ ܠܰܝܬ ܠܶܗ: ܘܰܠܪܽܘܚܳܐ ܕܚܰܕ ܗ̣ܽܘ ܐܝ̣ܬܰܘܗ̱ܝ ܕܠܐܴ ܫܽܘܓܢܳܝܳܐ ܘܰܕܠܐܴ ܒܽܘܠܒܳܠܐܴ: ܟܰܕ ܒܰܢܒܺܝ̈ܰܘܳܬܳܐ ܕܰܢܒܺܝ̈ܶܐ ܩܰܕܺܝ̈ܫܶܐ ܕܰܚܕܳܢܳܝܰܐ ܗ̱̇ܘ ܘܕܰܬܠܺܝܬܳܝܳܐ: ܘܰܕܗ̣ܽܘ ܟܰܕ ܗ̣ܽܘ ܐܰܠܳܗܳܐ ܫܰܪܺܝܪܳܐ ܩܳܪܝܳܐ ܘܡܶܣܬܰܟܠܐܴ: ܘܦܽܘܪܩܳܢܳܐ ܕܰܗܘܳܐ ܠܳܗ̇ ܬܠܺܝܬܳܐܝ̣ܬ ܐܶܬܶܐܪܶܙ ܘܶܐܬܒܰܕܰܩ ܒܺܐܝ̈ܕܰܝ ܡܒܰܕ̈ܩܳܢܶܐ ܘܚܰܙܳܝ̈ܶܐ ܕܰܓܢܺܝ̣̈ܙܳܬܳܐ: ܟܰܕ ܠܐ̱ܪܳܙܳܐ ܫܰܪܺܝܪܳܐ ܕܥܰܬܺܝܩܬܳܐ ܒܰܚܕܰܬܳܐ ܡܩܰܒܠܐܴ: ܠܰܒ̈ܢܶܝܗ̇ ܬܪ̈ܺܝܨܰܝ ܫܽܘܒܚܳܐ ܬܠܺܝܬܳܝܽܘܬܳܐ ܠܐܴ ܣܕܺܝܩܬܳܐ ܡܰܠܦܳܐ: ܘܰܠܗܽܘܢ ܬܠܳܬܳܐ ܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܩܰܕܺܝܫܳܐ ܛܳܒ̇ܥܳܐ: ܟܰܕ ܬܠܺܝܬܳܐܝ̣ܬ ܓܶܝܪ ܟܽܠܗܽܘܢ ܢܒܺܝ̈ܶܐ ܡܶܛܽܠ ܦܽܘܪܩܳܢܳܐ ܐ̱ܢܳܫܳܝܳܐ ܐܶܬܢܰܒܺܝܘ: ܕܠܰܬܠܳܬܳܐ ܡܳܪ̈ܘ̣ܕܶܐ ܕܰܒܥܶܠܕ̈ܒܳܒܶܐ ܕܶܐܫܬܰܥܒܰܕܘ̱ ܐܳܕܳܡ ܢܶܙܟܶܐ: ܬܠܺܝܬܳܝܳܐ ܕܰܐܠܳܗܽܘܬܳܐ ܚ̣ܙܳܐ ܠܨܰܠܡܶܗ ܝܰܩܺܝܪܳܐ ܕܰܐܫܚ̣ܶܬ ܒܰܚܛܺܝܬܳܐ: ܒܝܰܕ ܚܽܘܒܶܗ ܫܦܺܝܥ ܒܛܳܒܽܘܬܶܐ ܡܶܢ ܫܡܰܝ̈ܳܐ ܥܶܠܳܝ̈ܶܐ ܘܡܶܢ ܥܽܘܒܳܐ ܐܝ̣ܬܝܳܝܳܐ ܕܰܐܒܽܘܗ̱ܝ ܟܰܣܝܳܐ ܨܒܳܐ ܕܢܶܚܽܘܬ: ܟܰܕ ܠܓܰܒܪܺܐܝܶܠ ܡܰܠܐܱܟܳܐ ܫܰܕܰܪ: ܟܰܕ ܒܰܡܛܰܝܒܽܘܬ ܨܶܒܝܳܢܳܐ ܕܗܳܐ ܐܶܢܳܐ ܐܰܡܬܶܗ ܕܡܳܪܳܟ ܬܠܺܝܬܳܐܝ̣ܬ ܣܥ̣ܰܪ ܕܰܒܨܶܒܝܳܢܶܗ ܘܕܰܐܒܽܘܗ̱ܝ ܥܰܡ ܕܪܽܘܚܶܗ ܩܰܕܺܝܫܳܐ: ܘܡܶܢ ܐܶܕܢܳܐ ܠܟܰܪܣܳܐ ܥ̣ܰܠ: ܟܰܕ ܝܰܪ̈ܚܶܐ ܬܶܫܥܳܐ ܐܰܝܟ ܫܰܪܟܳܐ ܕܺܝܠܺܝ̣̈ܕܶܐ ܥܡ̣ܰܪ: ܘܰܒܝܰܠܕܶܗ ܬܗܺܝܪܳܐ ܒܬܽܘ̈ܠܐܷ ܕܠܐܴ ܚܒܳܠܐܴ ܢ̣ܛܰܪ: ܟܰܕ ܒܰܫܠܳܡܳܐ ܕܝܰܗ̣ܒ ܓܰܒܪܺܐܝܶܠ ܠܡܰܪܝܰܡ ܬܠܺܝܬܳܐܝ̣ܬ ܫܰܝܢܳܐ ܥܒ̣ܰܕ: ܒܶܝܬ ܫܡܰܝܳ̈ܢܶܐ ܠܓܰܒܳܐ ܕܰܐܪ̈ܥܳܢܳܝܶܐ: ܘܒܶܝܬ ܥܰܡܳܐ ܠܥܰܡ̱̈ܡܶܐ: ܘܒܶܝܬ ܢܰܦܫܳܐ ܠܦܰܓܪܳܐ: ܟܰܕ ܒܥܶܢܝܳܢܳܐ ܐܰܠܳܗܳܝܳܐ ܕܡܰܠܐܱܟܳܐ ܥܰܡ ܒܬܽܘܠܬܳܐ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ ܦ̣ܪܰܫ: ܠܐܱܒܳܐ ܕܰܡܫܰܕܰܪ: ܘܰܒܪܳܐ ܕܡܰܓܶܢ: ܘܪܽܘܚܳܐ ܩܰܕܺܝܫܳܐ ܕܓܳܡܰܪ ܘܰܡܫܰܡܠܐܷ: ܟܰܕ ܠܰܬܠܳܬ ܡܰܚ̈ܘܳܬܶܗ ܕܳܐܕܳܡ ܐܰܣܺܝ ܒܗܳܝ ܕܦܰܓܪܳܐ ܕܺܝܠܶܗ ܐܶܬܥܰܛܰܦ: ܘܠܰܥܕܶܝܢ ܐܰܦܢܝܶܗ: ܘܠܐܱܪܥܳܐ ܕܠܺܝܛܳܐ ܒܰܪܶܟ: ܘܰܠܝܳܪܬܽܘܬܶܗ ܐܰܗܦܟܶܗ: ܘܰܚܠܳܦ ܕܽܘܥ̈ܳܬܳܐ ܘܥܰܡ̈ܠܐܷ ܦܰܓܪܶܗ ܡܰܚܝܳܢܳܐ ܐܰܘܟܠܶܗ: ܟܰܕ ܠܰܬܠܳܬܳܐ ܚܽܘ̈ܝܳܒܶܐ ܕܚܰܘܳܐ ܒܡܰܪܝܰܡ ܐܶܬܥܛܺܝܘ ܒܗܳܝ ܕܡܰܠܝܰܬ݀ ܛܰܝܒܽܘܬܳܐ ܐܶܬܩܰܪܝܰܬ݀ ܘܰܒܪܺܝܟܰܬ݀ ܒܢܶܫ̈ܶܐ ܐܶܬܟܰܢܝܰܬ݀: ܘܰܬܩܰܒܠܺܝܢ ܠܒܽܘܟܪܶܗ ܕܥܶܠܳܝܳܐ ܘܬܺܝ̣ܠܕܺܝܢܳܝܗ̱ܝ ܐܶܡܶܗ ܕܡܳܪܝܳܐ ܐܶܫܬܰܡܗܰܬ݀: ܟܰܕ ܠܰܬܠܳܬ ܛܶܟ̈ܣܶܐ ܒܰܓܙܽܘܪܬܳܐ ܡܽܘܫܳܝܬܳܐ ܫܰܡܠܺܝ ܘܚܰܘܺܝ: ܕܶܐܬܺܝܠܶܕ ܡܶܢ ܒܬܽܘܠܬܳܐ: ܘܶܐܬܓܙܰܪ ܒܝܰܘܡܳܐ ܬܡܺܝܢܳܝܳܐ: ܘܰܥܡ̣ܰܕ ܘܒܰܛܶܠ ܠܥܰܬܺܝܩܬܳܐ ܘܰܗ̣ܘܳܐ ܪܺܝܫܳܐ ܘܫܽܘܪܳܝܳܐ ܕܰܚܕܰܬܳܐ: ܟܰܕ ܒܡܶܬܟܰܫܦܳܢܽܘܬܳܐ ܕܫܶܡܥܽܘܢ ܣܳܒܳܐ ܠܫܰܘܝܽܘܬ ܨܶܒܝܳܢܳܐ: ܘܕܰܐܒܳܐ ܘܕܰܒܪܳܐ ܘܰܕܪܽܘܚܳܐ ܓܠܐܴ: ܘܰܕܠܰܘ ܦܽܘܠܳܓܳܐ ܒܰܝܢܳܬܗܽܘܢ ܚܰܘܺܝ: ܘܰܕܚܰܕ ܗ̣ܽܘ ܟܝܳܢܳܐ ܘܫܽܘܠܛܳܢܳܐ ܘܡܰܥܒܕܳܢܽܘܬܳܐ ܩܪܺܝܚܳܐܝ̣ܬ ܐܰܘܕܺܝ: ܟܰܕ ܠܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ ܕܰܬܠܺܝܬܳܝܽܘܬܳܐ ܩܰܕܺܝܫܬܳܐ ܥܰܠ ܢܰܗܪܳܐ ܐܶܬܓܠܺܝܘ: ܐܰܒܳܐ ܕܡܰܙܥܶܩ ܕܗܳܢܰܘ ܒܶܪܝ̱ ܚܰܒܺܝܒܝ̱: ܘܰܒܪܳܐ ܕܥܳܡܶܕ ܡܶܢ ܐܺܝ̈ܕܰܝ ܥܰܒ̣ܕܶܗ: ܘܪܽܘܚܳܐ ܕܛܳܐܶܣ ܠܥܶܠ ܡܶܢ ܪܺܝܫܶܗ ܐܰܝܟ ܝܰܘܢܳܐ: ܟܰܕ ܕܶܝܢ ܠܰܬܠܳܬܳܐ ܢܶܣܝܽܘ̈ܢܶܐ ܕܩܰܪܶܒ ܣܳܛܳܢܳܐ ܠܰܡܫܺܝܚܳܐ ܐܶܬܚܰܝܰܒ ܒܗܽܘܢ: ܒܪܶܚܡܰܬ݀ ܟܰܪܣܳܐ ܐܶܡܳܐ ܕܰܚܒܳܠܳܐ: ܒܪܶܚܡܰܬ݀ ܟܶܣܦܳܐ ܥܶܩܳܪܳܐ ܕܟܽܠܗܶܝܢ ܒܺܝ̈ܫܳܬܳܐ: ܘܪܶܚܡܰܬ݀ ܫܽܘܒܚܳܐ ܘܫܽܘܥܠܳܝܳܐ ܕܥܰܠ ܐܰܠܳܗܳܐ: ܟܰܕ ܠܰܬܠܳܬܳܐ ܐܳܕ̈ܫܶܐ ܕܝܰܥܢܽܘܬܳܐ ܡܶܢ ܗܰܝܟܠܐܴ ܐܰܦ̣ܶܩ: ܠܙܳܒܽܘ̈ܢܶܐ ܘܰܡܙܰܒ̈ܢܳܢܶܐ ܕܥܶܪ̈ܒܶܐ ܘܬܰܘܪ̈ܶܐ ܘܝܰܘ̈ܢܶܐ: ܘܰܠܦܳܬܽܘܪ̈ܶܐ ܕܰܡܥܰܪ̈ܦܳܢܶܐ ܘܠܰܛܥܺܝ̣̈ܢܰܝ ܓܪ̈ܳܒܶܐ ܣܚ̣ܰܦ: ܘܰܠܗܳܝ ܡܶܠܬܳܐ ܕܰܛܢܳܢܶܗ ܕܒܰܝܬܳܟ ܐܰܟܠܰܢܝ̱ ܫܰܡܠܺܝ: ܟܰܕ ܒܥܺܐܕܳܐ ܬܠܺܝܬܳܝ ܫܡܳܗ̈ܶܐ ܕܰܐܪܒܰܥܶܣܪ̈ܶܐ ܘܰܕܐ̱ܪ̈ܳܙܶܐ ܘܰܕܦܶܨܚܳܐ ܬܠܺܝܬܳܐܝ̣ܬ ܣܥ̣ܰܪ: ܡܶܐܟܽܘܠܬܳܐ ܕܶܐܡܪܳܐ ܢܣܺܝܒܽܘܬܳܐ ܕܐ̱ܪ̈ܳܙܶܐ ܕܐ̱ܪܳܙܳܢܳܐܝ̣ܬ ܓܠܐܴ ܠܰܫܠܺܝ̈ܚܰܘܗ̱ܝ ܘܰܫܝܳܓܬܳܐ ܘܡܰܠܦܳܢܽܘܬܳܐ ܘܰܗ̣ܘܳܐ ܦܶܨܚܳܐ ܘܶܐܬܢܟܶܣ ܚܠܳܦܰܝܢ: ܟܰܕ ܬܠܺܝܬܳܐܝ̣ܬ ܠܘܳܬ ܫܶܡܥܽܘܢ ܘܰܠܘܳܬ ܫܠܺܝ̈ܚܶܐ ܡܰܠܶܠ ܕܰܩܕܳܡ ܕܢܶܩܪܶܐ ܬܰܪܢܳܓܠܐܴ ܬܰܪܬܶܝܢ ܙܰܒ̈ܢܺܝܢ ܬܠܳܬ ܙܰܒܢܺܝ̈ܢ ܬܶܟܦܽܘܪ ܒܺܝ: ܘܰܕܟܰܕ ܫܰܕܰܪܬܟܽܘܢ ܕܠܐܴ ܟܺܝ̈ܣܶܐ ܘܡܰܪ̈ܣܽܘܦܶܐ ܘܰܣܐܘ̣̈ܢܶܐ ܘܢܶܚܣܰܪ ܠܟܽܘܢ ܡܶܕܶܡ: ܘܗܳܫܳܐ ܗܰܘ ܕܺܐܝܬ ܠܶܗ ܟܺܝܣܳܐ ܘܡܰܪܣܽܘܦܳܐ ܢܶܫܩܽܘܠ: ܘܰܕܠܰܝܬ ܠܶܗ ܢܙܰܒܶܢ ܡܳܐܢܶܗ ܘܢܶܙܒܶܢ ܣܰܝܦܳܐ: ܟܰܕ ܒܰܬܠܺܝܬܳܐܝ̣ܬ ܐܶܬܳܐ ܝܽܘܕܳܐ: ܒܣܰܝ̈ܦܶܐ ܘܩܰܝ̈ܣܶܐ ܘܠܰܡܦܺܐܕ̈ܶܐ ܘܰܠܘܳܬ ܬܠܳܬ ܡܽܘܫ̈ܚܳܢ ܕܪ̈ܺܝܫܰܝ ܟܳܗ̈ܢܶܐ ܘܶܐܣܛܪ̈ܰܛܺܝܓܶܐ ܕܗܰܝܟܠܐܴ ܘܩܰܫܺܝ̈ܫܶܐ ܡܰܠܶܠ ܡܳܪܰܢ: ܟܰܕ ܐܰܝܟ ܕܥܰܠ ܓܰܝܳܣܳܐ ܢܦ̣ܰܩܬܽܘܢ: ܟܰܕ ܟܽܠܝܽܘܡ ܥܰܡܟܽܘܢ ܐܝ̣ܬܝ ܗ̱ܘܺܝܬ ܒܗܰܝܟܠܐܴ: ܟܰܕ ܬܠܳܬ ܙܰܒܢܺܝ̈ܢ ܬܠܺܝܬܳܐܝ̣ܬ ܨܰܠܺܝ: ܘܠܰܬܠܳܬܳܐ ܚܰܫ̈ܶܐ ܡܶܢ ܓܶܢܣܰܢ ܐܰܪܺܝܡ: ܒܩܰܕܡܳܝܳܐ ܠܰܓܙܳܪ ܕܺܝܢܳܐ ܕܡܰܘܬܳܐ: ܘܰܒܗܰܘ ܕܰܬܪܶܝܢ ܕܶܚܠܬܳܐ ܕܡܶܢ ܡܰܘܬܳܐ ܘܒܰܬܠܺܝܬܳܝܳܐ ܡܶܢܶܗ ܕܡܰܘܬܳܐ: ܘܛܽܘܦܣܳܐ ܚܰܘܺܝ ܠܰܒ̈ܢܰܝ ܥܺܕܬܳܐ ܕܰܬܠܺܝܬܳܐܝ̣ܬ ܢܨܰܠܽܘܢ ܒܠܺܠܝܳܐ: ܘܟܰܕ ܕܶܝܢ ܬܠܺܝܬܳܐܝ̣ܬ ܡܶܢ ܬܠܳܬܳܐ ܚܰܢܳܢ ܘܩܰܝܳܦܳܐ ܘܦܺܝܠܰܛܳܘܣ ܐܺܝܓܡܽܘܢܳܐ ܡܶܫܬܰܐܰܠ ܗ̱ܘܳܐ ܕܡܰܢܽܘ ܐܝ̣ܬܝܟ: ܘܦܽܘܢܳܝ̈ܶܐ ܬܠܳܬܳܐ ܦܰܢܺܝ: ܫܰܐܶܠ ܠܗܳܢܘܢ̇ ܕܰܫܡ̣ܰܥܘ̱ ܡܰܠܦܳܢܽܘܬܳܐ: ܘܕܶܐܢܳܐ ܐܝ̣ܬܝ ܒܪܳܐ ܕܐܰܠܳܗܳܐ ܚܰܝܳܐ: ܕܡܰܠܟܳܐ ܕܝܽܘ̈ܕܳܝܶܐ ܐܶܢܳܐ ܐܝ̣ܬܝ ܐܰܢ̱ܬ ܐܶܡ̣ܰܪܬ: ܟܰܕ ܬܠܺܝܬܳܐܝ̣ܬ ܒܒܶܝܬ ܦܺܝܠܰܛܳܘܣ ܒܠ̣ܰܥ: ܐܰܣܽܘܪܝܳܐ ܕܺܐܝ̈ܕܰܘܗܝ ܠܒܶܣܬܪܶܗ: ܘܢܶܓ̈ܕܶܐ ܕܥܰܠ ܚܰܨܶܗ: ܘܡܰܚ̈ܘܳܬܳܐ ܕܒܰܦܪ̈ܳܓܶܠܐܷ ܕܥܰܠ ܗܰܕܳܡܰܘ̈ܗ̱ܝ ܘܰܒܗܳܠܶܝܢ ܐܶܬܚܰܝܰܒ ܦܺܝܠܰܛܳܘܣ: ܟܰܕ ܒܦܽܘܢܳܝ̈ܶܐ ܬܠܳܬܳܐ ܕܰܠܘܳܬ ܝܽܘ̈ܕܳܝܶܐ ܐܶܬܚܰܪܰܪ ܦܺܝܠܰܛܳܘܣ ܒܗܳܝ ܕܶܐܡ̣ܰܪ ܕܳܐܦܠܐܴ ܚܕܳܐ ܥܶܠܬܳܐ ܕܫܳܘܝܳܐ ܠܡܰܘܬܳܐ ܒܶܗ ܡܶܫܟܰܚ ܐ̱ܢܳܐ: ܘܰܕܫܶܐܠ ܡܰܝ̈ܳܐ ܘܐܰܫܝ̣ܓ ܐܝ̣ܕܰܘ̈ܗ̱ܝ: ܣܰܒܽܘܢ ܐܰܢ̱ܬܘܽܢ ܕܽܘܢܽܘܗ̱ܝ ܐܰܝܟ ܢܳܡܽܘܣܟܽܘܢ: ܟܰܕ ܬܠܺܝܬܳܐܝ̣ܬ ܠܘܳܬ ܦܪ̈ܺܝܫܶܐ ܐܶܡ̣ܰܪ: ܕܙܶܠܘ̱ ܐ̱ܶܡ̣ܰܪܘ̱ ܠܬܰܥܠܐܴ ܗܳܢܳܐ: ܗܳܐ ܡܰܦܶܩ ܐ̱ܢܳܐ ܕܰܝ̈ܘܶܐ: ܘܗܳܐ ܥܳܒܶܕ ܐ̱ܢܳܐ ܐܳܣܘ̈ܳܬܳܐ: ܝܰܘܡܳܢܳܐ ܘܰܡܚܳܪ ܘܰܠܗܰܘ ܬܠܺܝܬܳܝܳܐ ܡܶܫܬܰܡܠܐܷ ܐ̱ܢܳܐ: ܘܙܳܕܶܩ ܠܺܝ ܕܝܰܘܡܳܢܳܐ ܘܰܡܚܳܪ ܘܰܠܗܰܘ ܕܒܳܬܪܶܗ ܐܳܙܶܠ ܐ̱ܢܳܐ: ܟܰܕ ܣܳܗܕܽܘܬܳܐ ܠܐܴ ܫܘܺܝܬܳܐ ܐܰܣܗܶܕܘ̱ ܝܽܘܕܳܝ̈ܶܐ ܘܶܐܡ̣ܰܪܘ̱ ܕܰܥܬܺܝܕ ܠܡܶܫ̣ܪܳܐ ܗܰܝܟܠܐܴ ܕܐܰܠܳܗܳܐ ܥܒܺܝܕ ܒܺܐܝ̈ܕܰܝܳܐ: ܘܰܒܝܰܕ ܬܠܳܬܳܐ ܝܰܘ̈ܡܺܝܢ ܡܶܫܟܰܚ ܕܢܶܥܒܶܕ ܐ̱ܚܪܺܢܳܐ ܕܠܐܴ ܥܒܺܝܕ ܒܺܐܝ̈ܕܰܝܳܐ: ܟܰܕ ܗ̣ܘܽ ܥܰܠ ܗܰܝܟܠܐܴ ܕܦܰܓܪܶܗ ܐܰܪܶܙ: ܟܰܕ ܝܽܘ̈ܕܳܝܶܐ ܠܘܳܬ ܦܺܝܠܰܛܳܘܣ ܐܶܡ̣ܰܪܘ̱ ܦܩܽܘܕ ܢܶܙܕܗܰܪ ܒܩܰܒܪܳܐ ܥܰܠ ܕܶܐܡ̣ܰܪ ܕܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ: ܘܰܒܝܰܕ ܢܳܛܽܘܪ̈ܶܐ ܐܰܚܬܶܡܘ̱ ܠܟܺܐܦܳܐ ܘܝܰܨܺܝܦܳܐܝ̣ܬ ܡܶܙܕܰܗܪܺܝܢ ܗ̱ܘܰܘ ܒܶܗ: ܟܰܕ ܬܠܳܬܳܐ ܝܰܘ̈ܡܺܝܢ ܐܰܟܪܶܙܘ̱ ܒܽܐܘܪܫܠܶܡ ܦܰܓܪ̈ܶܐ ܕܩܰܕܺܝ̈ܫܶܐ ܕܩܳܡ̣ܘ̱: ܕܡܳܢܰܘ ܗܳܢܳܐ ܣܽܘܥܪܳܢܳܐ ܕܰܥܒ̣ܰܕܬܽܘܢ: ܕܰܠܚܰܝܳܐ ܝܳܗܶܒ ܚܰܝ̈ܶܐ ܙܩܰܦ̣ܬܽܘܢ: ܘܒܳܬܰܪܟܶܢ ܗܦܰܟ̣ܘ̱ ܠܩܰܒܪ̈ܰܝܗܽܘܢ: ܟܰܕ ܠܰܬܠܳܬܳܐ ܡܰܟܺܝ̣̈ܟܰܝ ܬܰܪܥܺܝܬܳܐ ܬܠܺܝܬܳܐܝ̣ܬ ܫܰܒܰܚ: ܠܩܶܢܛܪܽܘܢܳܐ ܕܶܐܡ̣ܰܪ ܕܠܐܴ ܫܳܘܶܐ ܐ̱ܢܳܐ ܕܬܶܥܽܘܠ ܬܚܶܝܬ ܡܰܛܰܠܠܝ̱ ܠܗܰܝܡܳܢܽܘܬܶܗ ܩܰܠܶܣ: ܠܝܽܘܚܰܢܳܢ ܕܶܐܡ̣ܰܪ ܕܠܐܴ ܫܳܘܶܐ ܐ̱ܢܳܐ ܕܶܐܫܪܶܐ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ: ܐܰܝܟܰܢܳܐ ܕܰܢܣܺܝܡ ܐܺܝܕܶܗ ܥܰܠ ܪܺܝܫܶܗ ܐܰܫܘܝܶܗ: ܠܫܶܡܥܽܘܢ ܐܶܡ̣ܰܪ ܕܰܦܪܽܘܩ ܠܳܟ ܡܶܢܝ̱ ܕܓܰܒܪܳܐ ܐ̱ܢܳܐ ܚܰܛܳܝܳܐ ܫܶܬܶܐܣܬܳܐ ܠܥܺܕܬܳܐ ܣܳܡܶܗ: ܟܰܕ ܕܶܝܢ ܬܠܺܝܬܳܐܝ̣ܬ ܐܰܒܳܐ ܡܶܢ ܫܡܰܘ̈ܗ̱ܝ ܪ̈ܳܡܶܐ ܩܳܠܶܗ ܐܰܫܡܰܥ: ܘܰܐܣܗܶܕ ܕܰܒܪܶܗ ܟܝܳܢܳܝܳܐ ܐܝ̣ܬܰܘܗ̱ܝ ܟܰܕ ܐܶܡ̣ܰܪ ܥܰܠ ܢܰܗܪܳܐ ܕܗܳܢܰܘ ܒܶܪܝ̱ ܚܰܒܺܝܒܝ̱: ܘܥܰܠ ܛܽܘܪ ܬܳܒܽܘܪ ܩܕܳܡ ܬܠܳܬܳܐ ܬܰܠܡܺܝ̈ܕܶܐ: ܘܰܒܥܶܕܳܢ ܙܩܺܝܦܽܘܬܳܐ ܕܫܰܒܚܶܬ ܘܬܽܘܒ ܡܫܰܒܰܚ ܐ̱ܢܳܐ: ܘܗܳܫܳܐ ܒܳܥܶܝܢܰܢ ܡܶܢܳܟ ܡܫܺܝܚܳܐ ܐܰܠܳܗܳܐ ܕܺܝܠܰܢ: ܕܰܬܫܰܡܠܐܷ ܠܰܢ ܒܫܽܘ̈ܟܳܢܶܐ ܕܪܽܘܚܳܐ ܩܰܕܺܝܫܳܐ ܘܰܬܩܰܕܶܫ ܠܰܢ ܒܢܰܦܫܳܐ ܘܰܒܦܰܓܪܳܐ ܘܗܰܘܢܳܐ ܘܬܶܓܡܽܘܪ ܠܰܢ ܒܟܽܠܗܶܝܢ ܐܰܝܠܶܝܢ ܕܫܳܦܪ̈ܳܢ ܠܳܟ: ܘܰܬܚܰܣܶܐ ܚܰܘ̈ܒܰܝܢ ܘܰܚܛܳܗܰܝ̈ܢ ܒܝܰܡܳܐ ܫܦܺܝܥܳܐ ܕܰܚܢܳܢܳܟ: ܘܬܶܡܪܽܘܩ ܡܶܢܰܢ ܟܽܠ ܨܘܽܥ̈ܨܳܥܶܐ ܕܰܚܛܺܝܬܳܐ: ܘܬܰܢܺܝܚ ܠܥܰܢܺܝ̈ܕܶܐ ܡܗܰܝ̈ܡܢܶܐ ܐܰܝܠܶܝܢ ܕܰܥܢ̣ܰܕܘ̱ ܡܶܢܰܢ ܒܰܬܪܺܝܨܽܘܬ ܫܽܘܒܚܳܐ: ܒܰܣܶܡ ܐܶܢܽܘܢ ܒܰܐܘܘ̈ܳܢܶܐ ܛܽܘܒܬܳܢ̈ܶܐ ܘܰܒܡܰܫܟ̈ܢܶܐ ܕܟܺܐܢ̈ܶܐ ܐܰܝܟܰܢܳܐ ܕܥܳܢ̈ܳܐ ܕܺܝܠܳܟ ܘܡܰܪܥܺܝܬܳܟ ܒܩ̈ܳܠܶܐ ܚܢܝ̣̈ܓܶܐ ܡܶܬܟܰܫܦܳܐ ܠܰܚܢܳܢܳܟ: ܘܩܳܥܝܳܐ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ܀