ܦܪܽܘ̣ܡܝܽܘܢ

ܠܗܰܘ ܡܰܠܟܳܐ ܕܬܶܫܒܽܘܚܬܳܐ: ܕܰܓܒܳܐ ܠܶܗ ܟܳܪܽܘܙܳܐ ܒܛܰܝܒܽܘܬܶܗ: ܘܨܰܒܶܬ ܠܪܰܗܳܛܶܗ ܒܰܚܢܳܢܶܗ: ܘܳܐܦ ܒܚܽܘܒܶܗ ܫܶܐܠ ܒܰܫܠܳܡܶܗ ܘܕܳܨ ܒܚܰܕܽܘܬܳܐ ܒܓܰܘ ܟܰܪܣܳܐ ܕܶܐܡܶܗ ܠܩܽܘܒܠܶܗ: ܘܚܰܕܺܝ ܠܰܙܟܰܪܝܳܐ ܘܠܶܐܠܺܝܫܒܰܥ ܒܡܰܘܠܳܕܶܗ: ܕܰܠܗܰܘ ܕܰܓܒܳܝܗ̱ܝ ܡ̣ܶܢ ܟܰܪܣܳܐ ܕܶܐܡܶܗ: ܫܽܘܒܚܳܐ ܘܺܐܝܩܳܪܳܐ ܘܩܽܘܒܳܠ ܛܰܝܒܽܘܬܳܐ ܡܰܣܩܺܝܢܰܢ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܰܢܽܘ ܡܶܫܟܰܚ ܕܰܒܣܰܡ̱̈ܡܳܢܶܐ ܐܰܪ̈ܥܳܢܳܝܶܐ ܠܫܽܘܦܪܳܐ ܕܡܰܠܝܽܘܬܳܟ ܢܨܽܘܪ ܐܳܘ ܝܰܠܕܳܐ ܪܚܺܝܡܳܐ ܕܡ̣ܶܢ ܡܰܠܰܐܟ̈ܶܐ ܐܶܣܬܰܒܰܪ ܒܰܛܢܶܗ: ܘܫܶܬܩܳܐ ܐܰܠܒܶܟ ܠܰܐܒܽܘܗ̱ܝ ܥܰܠ ܕܶܐܬܦܰܠܰܓ ܥܰܠ ܝܰܠܕܶܗ: ܩܳܠܳܐ ܕܶܐܙܕܪܰܥ ܒܓܰܘ ܚܰܩܠܐ ܕܟܰܪܣܳܐ ܕܰܥܩܰܪܬܳܐ ܡ̣ܶܢ ܐܰܟܳܪܳܐ ܟܳܗܳܢܳܝܳܐ: ܕܶܐܬܚܨܶܕ ܩܳܠܶܗ ܡ̣ܶܢ ܚܛܽܘܛܳܐ ܕܠܶܫܳܢܶܗ: ܣܢܺܐܓܪܳܐ ܡܠܺܝܠܳܐ ܕܶܐܬܒܛܶܢ ܒܓܰܘ ܟܰܪܣܳܐ ܒܡܰܪܒܥܳܐ ܥܰܩܪܳܐ ܕܰܒܩܳܠܐ ܢܰܟܪܶܙ ܘܰܢܒܰܕܶܩ ܥܰܠ ܪܰܥܡܳܐ ܕܩܳܠܳܐ ܕܰܗܘܳܐ ܫܰܠܝܳܐ ܘܫܰܬܺܝܩܳܐ ܒܓܰܘ ܥܽܘܒܳܐ ܕܝܳܠܶܕܬܶܗ: ܢܒܺܝܳܐ ܪܰܒܳܐ ܕܡ̣ܶܢ ܟܰܪܣܳܐ ܕܶܐܡܶܗ ܐܶܬܺܝܠܶܕ: ܘܡܶܢ ܒܰܛܢܳܐ ܝ̣ܠܶܦ ܐ̱ܪ̈ܳܙܰܘܗ̱ܝ ܕܡܳܪܶܗ: ܘܡܶܢ ܓܰܘ ܥܘ̣ܒܳܐ ܕܐܶܡܶܗ ܫܘ̣ܒܚܳܐ ܙܡܰܪ ܠܶܫܳܢܶܗ: ܒܰܛܢܳܐ ܕܕܳܨ ܒܡܰܪܒܥܳܐ ܕܰܥܩܰܪܬܳܐ ܠܽܘܩܒܰܠ ܦܺܐܪܳܐ ܡܰܚܝܳܢܳܐ ܕܰܒܓܰܘ ܒܬܽܘܠܬܳܐ: ܡܰܘܥܺܝܬܳܐ ܪܓܺܝܬܳܐ ܕܡ̣ܶܢ ܚܰܩܠܳܐ ܝܰܒܺܝܫܬܳܐ ܬܗܝ̣ܪܳܐܝ̣ܬ ܫܰܘܚܰܬ݀: ܘܥܰܠ ܥܶܩܳܪܳܐ ܕܚܰܝ̈ܶܐ ܕܺܝܥܳܐ ܡ̣ܶܢ ܐܰܪܥܳܐ ܨܗܺܝܬܳܐ ܒܰܕܩܰܬ: ܣܓܽܘܠܳܐ ܚܰܕܬܳܐ ܕܡ̣ܶܢ ܣܰܬܳܐ ܥܩܰܪܬܳܐ ܠܢܽܘܓܪܳܐ ܐܶܬܚܰܘܺܝ: ܘܰܠܢܰܦ̈ܫܳܬܳܐ ܡܥܳܩ̈ܳܬܳܐ ܒܝܰܕ ܚܰܡܪܶܗ ܒܰܝܰܐܐ: ܛܰܠܝܳܐ ܒܬܽܘܠܳܐ ܕܶܐܬܚܙܺܝ ܡ̣ܶܢ ܣܳܒ̈ܶܐ ܥܰܩܪ̈ܶܐ ܟܰܕ ܣܐܷܒܘ̱ ܕܢܰܘܕܰܥ ܥܰܠ ܚܽܘܕܳܬܳܐ ܕܰܒܪܺܝܬܳܐ: ܡܶܨܥܳܝܳܐ ܕܕܺܝܰܐܬܺܝ̈ܩܰܐܣ ܕܰܐܚܺܝܕܳܐ ܥܶܩܒܬܶܗ ܛܶܠܳܢܺܝܬܳܐ ܕܢܳܡܽܘܣܳܐ ܥܰܬܺܝܩܳܐ: ܪܺܝܫܺܝܬܳܐ ܝܰܡܺܝܢܳܝܬܳܐ ܕܰܣܒܰܪܬܳܐ ܚܕܰܬܳܐ: ܪܰܒܳܐ ܒܺܝܠܺܝ̈ܕܰܝ ܢܶܫ̈ܶܐ ܕܡܰܙܥܶܩ ܥܰܠ ܪܰܒܽܘܬܳܐ ܡܥܰܠܰܝܬܳܐ: ܘܰܡܪܰܝܰܡܬܳܐ ܕܪܰܒܳܐ ܘܰܡܫܰܒܚܳܐ ܕܶܐܬܬܰܚܬܺܝ ܠܣܽܘܪܳܩܳܐ ܨܶܒܝܳܢܳܝܳܐ: ܡܣܰܒܪܳܢܳܐ ܫܰܪܺܝܪܳܐ ܕܚܰܘܺܝ ܢܰܦܫܶܗ ܡ̣ܶܢ ܓܰܘ ܥܩܰܪܬܳܐ: ܕܢܰܣܗܶܕ ܥܰܠ ܝܰܠܕܳܐ ܣܓܺܝܕܳܐ ܕܡ̣ܶܢ ܥܽܘܒܳܐ ܒܬܽܘܠܳܐ: ܝܰܠܕܳܐ ܕܚܰܝ̈ܶܐ ܕܰܕܢܰܚ ܡ̣ܶܢ ܡܰܪܒܥܳܐ ܡܺܝܬܳܐ ܕܰܢܢܰܚܶܡ ܒܦܶܬܓܳܡܰܘ̈ܗ̱ܝ ܠܐ̱ܢܳܫ̈ܳܐ ܩܒܺܝܪ̈ܰܝ ܒܰܚܛܺܝܬܳܐ: ܥܽܘܠܳܐ ܩܰܕܺܝܫܳܐ ܒܰܪ ܟܳܗܢܳܐ ܙܰܗܝܳܐ: ܡܣܰܒܪܳܢܳܐ ܕܺܝܠܺܝܕ ܐܰܠܳܗܳܐܝ̣ܬ ܒܕܰܟܝܽܘܬܳܐ ܘܩܰܕܺܝܫܽܘܬܳܐ: ܥܰܒܕܳܐ ܪܚܺܝܡܳܐ ܕܰܢܒܰܕܶܩ ܥܰܠ ܡܳܪܳܐ ܡܪܰܚܡܳܢܳܐ: ܐܺܝܙܓܰܕܳܐ ܕܫܰܝܢܳܐ ܕܪܳܗܶܛ ܩܕܳܡ ܡܰܠܟܳܐ ܕܰܫܠܳܡܳܐ: ܝܰܠܽܘܕܳܐ ܒܪܺܝܟܳܐ ܕܰܡܫܰܘܕܰܥ ܬܰܘܕܺܝܬܳܐ ܕܟܽܠܶܗ ܟܝܳܢܳܐ ܕܓܰܘܳܐ: ܟܰܘܟܒܳܐ ܢܰܗܺܝܪܳܐ: ܡܚܰܘܝܳܢܶܗ ܕܨܰܦܪܳܐ ܫܰܪܺܝܪܳܐ: ܨܰܦܪܳܐ ܦܨܺܝܚܳܐ ܡܒܰܕܩܳܢܶܗ ܕܺܐܝܡܳܡܳܐ ܫܒܺܝܚܳܐ: ܫܪܳܓܳܐ ܦܰܐܝܳܐ ܡܚܰܘܝܳܢܶܗ ܕܢܽܘܗܪܳܐ ܡܬܽܘܡܳܝܳܐ ܘܠܚܽܘܕܳܝܳܐ: ܣܰܗܪܳܐ ܙܰܒܢܳܝܳܐ ܡܶܫܟܚܳܢܶܗ ܕܫܶܡܫܳܐ ܕܶܝܢ ܗܰܘ ܐܺܝܬܝܳܝܳܐ: ܟܳܗܢܳܐ ܐܰܪܥܳܢܳܝܳܐ ܒܰܪ ܐܪܳܙܶܗ ܕܪܰܒ ܟܽܘܡܪ̈ܶܐ ܫܡܰܝܳܢܳܐ: ܩܳܠܳܐ ܓܰܠܝܳܐ ܕܰܐܟܪܶܙ ܟܰܣܝܽܘܬܳܗ̇ ܕܡܶܠܬܳܐ ܓܢܺܝܙܬܳܐ: ܡܰܠܰܐܟܳܐ ܕܡܳܪܝܳܐ: ܠܰܡܦܺܐܕܳܐ ܕܥܺܕ̈ܳܬܳܐ: ܫܪܳܓܳܐ ܢܰܗܺܝܪܳܐ ܕܕܰܝܪ̈ܳܬܳܐ: ܪܰܗܳܛܳܐ ܩܰܕܡܳܝܳܐ ܕܰܒܕܰܘܨܳܐ ܒܰܛܢܶܗ: ܘܒܰܪܘܳܙܳܐ ܡܰܘܠܳܕܶܗ ܘܒܰܦܨܺܝܚܽܘܬܳܐ ܝܰܘܡܳܐ ܕܥܰܕܥܺܐܕܶܗ: ܝܰܘܡܳܢܳܐ ܙܟܰܪܝܳܐ ܕܳܐܶܨ ܕܶܐܫܬܪܺܝ ܠܶܫܳܢܶܗ: ܘܰܥܩܰܪܬܳܐ ܦܳܪܥܳܐ ܬܰܘܕܺܝܬܳܐ ܕܶܐܫܬܰܡܠܺܝ ܣܽܘܟܳܝܳܗ̇. ܘܺܝܗܽܘܕ ܦܨܺܝܚܳܐ ܒܝܰܠܽܘܕܳܐ ܚܰܕܬܳܐ: ܘܠܶܘܳܝ̈ܶܐ ܙܳܡܪܺܝܢ ܬܶܫܒܽܘܚܬܳܐ ܕܰܚܙܰܘ ܬܶܕܡܽܘܪܬܳܐ: ܠܥܰܩܪ̈ܶܐ ܡܺܝ̈ܬܶܐ ܕܰܗܘܳܐ ܢܽܘܚܳܡܳܐ ܠܦܰܓܪ̈ܰܝܗܽܘܢ: ܘܳܐܦ ܠܣܳܒ̈ܶܐ ܥܰܬܺܝ̈ܩܶܐ ܕܶܐܬܚܰܕܰܬܘ̱ ܩܢܽܘ̈ܡܰܝܗܽܘܢ: ܝܰܘܡܳܢܳܐ ܬܪܶܝܢ ܝܰܠܕܺܝ̣̈ܢ ܬܡܺܝ̈ܗܶܐ ܐܶܬܚܙܺܝܘ ܒܥܳܠܡܳܐ: ܝܰܠܽܘܕܳܐ ܚܰܕܬܳܐ ܡ̣ܶܢ ܡܰܪܒܥܳܐ ܥܰܬܺܝܩܳܐ: ܘܩܳܠܳܐ ܚܰܕܬܳܐ ܡ̣ܶܢ ܡܰܪܒܥܳܐ ܥܰܬܺܝܩܳܐ: ܘܩܳܠܳܐ ܚܰܕܬܳܐ ܡ̣ܶܢ ܠܶܫܳܢܶܗ ܕܰܙܟܰܪܝܳܐ: ܘܒܰܕܓܽܘܢ ܠܳܟ ܡܦܺܝܣܺܝܢܰܢ ܐܳܘ ܝܰܠܕܳܐ ܕܥܰܩܪܽܘܬܳܐ ܛܳܠܽܘܡܬܳܐ: ܘܫܳܪܽܘܝܳܐ ܕܰܐܣܺܝܪܽܘܬܳܐ ܕܶܝܢ ܕܠܶܫܳܢܳܐ ܡܶܬܦܰܠܓܳܢܳܐ: ܕܬܶܫܪܶܐ ܘܬܶܕܚܽܘܩ ܡܶܢܰܢ ܒܺܐܝܙܓܰܕܽܘܬܳܟ ܕܰܚܠܳܦܰܝܢ: ܠܟܽܠܗܽܘܢ ܐܰܣܽܘܪ̈ܶܐ ܕܰܚܛܺܝܬܳܐ: ܘܰܠܟܽܠܗܽܘܢ ܚܰܫ̈ܶܐ ܡܣܰܓ̈ܦܳܢܶܐ ܕܰܦܠܺܝܓܽܘܬܳܐ ܕܬܰܪܥܺܝܬܳܐ: ܘܬܶܬܟܰܫܰܦ ܐܳܦ ܗܳܫܳܐ ܡܶܬܚܰܢܢܳܐܝ̣ܬ ܠܡܳܪܝܳܐ: ܕܢܰܫܶܒ ܪܽܘܚܳܐ ܕܛܰܝܒܽܘܬܶܗ ܗܳܝ ܣܳܥܪܰܬ݀ ܟܽܠ ܬܶܕܡܪ̈ܳܬܳܐ: ܥܰܠ ܓܰܘܳܐ ܡܶܬܝܰܕܥܳܢܳܐ ܕܥܺܕܬܶܗ ܡܗܰܝܡܰܢܬܳܐ ܘܰܢܨܰܒܶܬ ܠܣܰܘ̈ܟܳܬܳܐ ܥܰܩܪ̈ܶܐ ܕܢܰܦ̈ܫܳܬܰܢ ܒܦܺܐܪ̈ܶܐ ܥܰܬܺܝ̈ܩܶܐ ܕܰܐܠܳܗܽܘܬܶܗ ܡܪܰܝܰܡܬܳܐ: ܘܢܰܥܒܰܪ ܡܶܢܰܢ ܠܡܰܪ̈ܕܘܳܬܳܐ ܘܰܠܥܰܩܪܽܘܬܳܐ ܠܳܐ ܡܰܦܪܝܳܢܺܝܬܳܐ ܕܢܰܦ̈ܫܳܬܰܢ: ܘܢܶܬܶܠ ܠܰܢ ܡܰܦܬܰܚ ܦܽܘܡܳܐ ܒܬܰܘܕܺܝܬܳܐ ܫܰܪܺܝܪܬܳܐ ܘܰܒܗܰܝܡܳܢܽܘܬܳܐ ܕܒܳܟ: ܐܰܝܟ ܕܠܰܐܒܽܘܟ ܙܟܰܪܝܳܐ ܒܰܙܒܰܢ ܡܰܘܠܳܕܳܟ: ܐܰܝܟܰܢܳܐ ܕܟܰܕ ܡ̣ܶܢ ܫܶܬܩܳܐ ܠܳܐ ܡܩܰܠܣܳܐ ܡܶܬܚܰܪܪܺܝܢܰܢ ܘܡ̣ܶܢ ܥܰܩܪܽܘܬܳܐ ܕܰܥܒܳܕ̈ܶܐ ܒܺܝ̈ܫܶܐ ܡܰܓܗܶܝܢܰܢ: ܥܰܡ ܙܟܰܪܝܳܐ ܐܰܒܽܘܟ ܕܶܐܫܬܪܺܝ ܠܶܫܳܢܶܗ ܒܝܽܘܡ ܡܰܘܠܳܕܳܟ ܢܰܘܕܶܐ: ܘܥܰܡ ܐܶܠܝ̣ܫܒܰܥ ܕܥܶܒܪܰܬ݀ ܥܰܩܪܽܘܬܳܗ̇ ܒܰܒܛܺܝܢܽܘܬܳܟ ܢܫܰܒܰܚ ܠܗܰܘ ܝܰܠܕܳܐ ܕܕܽܘܡܳܪܳܐ ܕܡ̣ܶܢ ܡܰܪܒܥܳܐ ܕܶܐܡܳܟ ܕܳܨܬ ܠܩܽܘܒܠܶܗ ܘܠܰܐܒܽܘܗ̱ܝ ܓܢܺܝܙܳܐ ܕܥܰܒ̣ܕ݂ܳܟ ܐܺܝܙܓܰܕܳܐ ܠܚܰܒܺܝܒܳܐ ܕܺܝܠܶܗ: ܘܰܠܪܽܘܚܳܐ ܩܰܕܺܝܫܳܐ ܕܟܰܕ ܐܰܢ̱ܬ ܒܓܰܘ ܟܰܪܣܳܐ ܐܶܬܡܠܺܝܬ ܡܶܢܶܗ: ܗܳܫܳܐ܀

ܥܶܛܪܳܐ

ܙܳܪܰܥ ܫܰܝܢܳܐ ܒܚܽܘܪܒܳܐ ܘܡܰܟܪܶܙ ܫܠܳܡܳܐ ܒܕܰܒܪܳܐ ܘܡܶܛܽܠ ܗܳܕܶܐ ܡܰܦܢܶܐ ܛܳܥܰܝ̈ܳܐ ܠܺܝܕܰܥܬܳܐ: ܝܽܘܚܰܢܳܢ ܐܺܝܙܓܰܕܳܐ ܪܰܗܳܛܳܐ ܩܰܕܡܳܝܳܐ: ܘܰܐܦܺܝܣ ܠܗܰܘ ܕܡܶܢܳܟ ܐܰܠܳܗܳܐܝ̣ܬ ܐܶܬܟܪܶܙ: ܢܩܰܒܶܠ ܠܦܺܝܪܡܳܐ ܕܗܳܫܳܐ ܗܳܐ ܩܰܪܶܒܢܰܢ: ܘܢܰܦܢܶܐ ܠܰܢ ܫ̈ܶܐܠܳܬܰܢ: ܘܰܢܫܰܟܶܢ ܠܰܢ ܒܶܗ ܚܽܘܣܳܝܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܢܶܥܛܶܐ ܡܶܢܰܢ ܠܒܺܝ̈ܫܳܬܳܐ: ܘܰܥܒܶܕ ܦܺܐܪ̈ܶܐ ܕܫܳܘܶܝܢ ܠܰܬܝܳܒܽܘܬܳܐ ܐܰܝܟ ܡܶܠܰܬ݀ ܦܽܘܡܳܟ ܫܰܪܝ̣ܪܳܐ: ܐܰܝܟܰܢܳܐ ܕܟܰܕ ܕܟܰܝ̈ܳܐ ܩܕܳܡܰܘܗ̱ܝ ܡܶܬܚܙܶܝܢܰܢ: ܢܫܰܒܚܺܝܘܗ̱ܝ ܢܰܨܺܝܚܳܐܝ̣ܬ ܘܰܢܒܰܪܟܺܝܘܗ̱ܝ ܩܰܕܺܝܫܳܐܝ̣ܬ: ܘܠܰܐܒܽܘܗ̱ܝ ܘܰܠܪܽܘܚܶܗ ܩܰܕܺܝܫܳܐ: ܗܳܫܳܐ܀