ܩܰܕܡܳܝܰܬ݀ ܨܠܽܘ̣ܬܳܐ ܕܫܽܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ: ܘܪܳܚܶܡ ܐ̱ܢܳܫܳܐ ܕܰܐܝܟ ܢܺܝܢܘܶܐ ܢܶܗܦܽܘܟ ܡ̣ܶܢ ܒܺܝ̈ܫܳܬܳܐ: ܘܰܐܝܟ ܕܩܰܒܶܠܬ ܐܳܘ ܡܳܪܝܳܐ ܒܳܥܽܘܬܗܽܘܢ: ܘܦܰܨܺܝܬ ܐܶܢܽܘܢ ܡ̣ܶܢ ܪܽܘܓܙܳܐ ܗܰܘ ܕܰܓܙܺܝܪ ܗ̱ܘܳܐ ܥܠܰܝܗܽܘܢ: ܩܰܒܶܠ ܡܶܢܰܢ ܒܨܺܝܪ̈ܶܐ ܨܰܘܡܰܢ: ܘܶܐܬܪܰܥܳܐ ܒܰܨܠܰܘ̈ܳܬܰܢ ܡܚܺܝ̈ܠܳܬܳܐ: ܘܰܐܥܒܰܪ ܡܶܢܰܢ ܒܰܚܢܳܢܳܟ: ܟܽܠ ܡܰܪ̈ܕܘܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܗܰܘ ܓܰܢ̱ܒܳܪܳܐ ܘܚܰܝܠܬܳܢܳܐ ܘܛܳܒܳܐ ܒܰܠܚܽܘܕܰܘܗ̱ܝ: ܐܰܠܳܗܳܐ ܕܝܳܗܶܒ ܡܰܘܗ̈ܒܳܬܶܗ ܠܳܐ ܡܶܬܬܰܘܝܳܢܳܐܝ̣ܬ: ܘܪܳܓܶܙ ܕܶܝܢ ܡܶܛܽܠܳܬܰܢ ܕܢܶܬܬܘܶܐ ܚܢܰܢ: ܟܰܕ ܗ̣ܽܘ ܐܺܝܬܰܘܗ̱ܝ ܠܳܐ ܚܳܫܽܘܫܳܐ: ܠܗܰܘ ܕܡܶܛܽܠ ܪܶܚܡܰܬ ܐ̱ܢܳܫܽܘܬܶܗ ܐܶܬܪܟܶܢ ܠܘܳܬ ܝܰܘܢܳܢ ܕܰܢܫܰܕܪܶܗ ܟܳܪܽܘܙܳܐ ܠܢܺܝܢܘ̈ܳܝܶܐ: ܕܢܰܦܢܶܐ ܐܶܢܽܘܢ ܡ̣ܶܢ ܐܽܘܪ̈ܚܳܬܗܽܘܢ ܒܺܝ̈ܫܳܬܳܐ: ܐܰܦܢܳܐ ܐܳܦ ܠܰܢ ܗܳܫܳܐ ܡܳܪܝܳܐ ܡ̣ܶܢ ܥܒܳܕܰܝ̈ܢ ܒܺܝ̈ܫܶܐ: ܘܛܰܪ ܡܰܘܗ̈ܒܳܬܳܟ ܕܰܠܘܳܬܰܢ ܠܳܐ ܡܶܬܚܰܠܨܳܢ̈ܝܳܬܳܐ: ܘܚܰܣܳܐ ܚܛܳܗܰܝ̈ܢ: ܘܰܠܚܺܝ̣ ܘܰܐܥܒܰܪ ܣܰܟܠܘ̈ܳܬܰܢ: ܘܰܦܪܽܘܩ ܠܰܢ ܡ̣ܶܢ ܟܽܠܗܶܝܢ ܡܰܚܘ̈ܳܬܳܐ ܘܫܰܒ̈ܛܶܐ ܕܪܽܘܓܙܳܐ: ܘܰܒܥܽܘܬܪ̈ܶܐ ܕܰܚܢܳܢܳܟ ܐܰܥܬܰܪ ܠܰܢ: ܘܳܐܦ ܒܰܫܦܺܝܥܽܘܬ ܪ̈ܰܚܡܰܝܟ ܣܰܬܪܰ ܠܰܢ: ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܺܝܠܰܢ ܗܰܘ ܝܰܡܳܐ ܕܛܳܒܽܘܬܳܐ: ܘܰܡܥܺܝܢܳܐ ܕܟܽܠܳܗ̇ ܩܰܕܺܝܫܽܘܬܳܐ: ܘܪܶܕܝܳܐ ܕܪ̈ܰܚܡܶܐ ܘܰܕܚܰܝܽܘܣܬܳܢܽܘܬܳܐ: ܗܰܘ ܗܰܢܺܝܳܐܐ ܠܰܐܝܠܶܝܢ ܕܡܶܬܬܰܪܨܺܝܢ: ܘܒܰܣܺܝܡܳܐ ܘܰܡܥܰܕܪܳܢܳܐ ܠܰܐܝܠܶܝܢ ܕܬܳܝܒܺܝܢ: ܗܰܘ ܕܰܡܚܰܒܶܒ ܐܰܢ̱ܬ ܠܗܳܢܽܘܢ ܕܡܶܬܦܢܶܝܢ: ܘܩܰܪܺܝܒ ܐܰܢ̱ܬ ܠܗܳܢܽܘܢ ܕܒܰܡܪܰܚܡܳܢܽܘܬܳܟ ܬܽܘܒ ܡܶܬܓܰܘܣܺܝܢ: ܚܢܰܢ ܕܶܝܢ ܕܰܥܕܰܟܺܝܠ ܡ̣ܶܢ ܬܪܺܝܨܽܘܬܳܐ ܘܙܰܕܺܝܩܽܘܬܳܐ ܡܰܒܥܕܺܝܢܰܢ: ܟܰܕ ܡܰܚܫܰܒܬܳܐ ܫܚܺܝܡܬܳܐ ܐܳܦ ܚܺܐܦܳܐ ܕܡܶܬܦܰܢܝܳܢܽܘܬܳܐ ܢܣܰܒܢܰܢ: ܘܫܽܘܪܳܝܳܐ ܠܰܬܝܳܒܽܘܬܳܐ ܐܰܪܡܺܝܢܰܢ: ܟܰܕ ܡܶܬܚܰܢܓܝ̣ܢܰܢ ܩܕܳܡܰܝܟ: ܡܦܺܝܣܺܝܢܰܢ ܠܢܰܓܺܝܪܽܘܬ ܪܽܘܚܳܟ ܡܫܰܝܰܢܬܳܐ: ܕܳܐܦ ܩܰܠܺܝܠܐܴܝ̣ܬ ܬܶܩܪܽܘܒܝ̱ ܘܬܰܕܪܶܟܝ̱ ܠܰܢ ܛܰܝܒܽܘܬܳܐ ܕܪܶܚܡܰܬ ܐ̱ܢܳܫܽܘܬܳܟ ܬܩܽܘܡܝ̱ ܕܶܝܢ ܒܬܰܪܥܺܝܬܳܐ ܩܕܳܡ ܪܽܘܓܙܳܐ ܕܚܺܝ̣ܠܳܐ ܕܰܥܠܰܝܢ: ܘܰܬܒܰܛܶܠ ܠܰܓܙܳܪ ܕܺܝܢܳܐ ܕܺܝܠܳܟ ܕܰܥܠܰܝܢ: ܘܰܡܣܳܡ ܒܪܺܝܫܳܐ ܕܰܠܩܽܘܒܠܰܢ: ܘܢܺܝܚܽܘܬܳܐ ܕܺܝܠܳܟ ܬܰܝܬܶܐ ܠܰܢ: ܠܛܰܝܒܽܘܬܳܟ ܠܠܐܴ ܡܶܬܥ̱ܰܗܕܳܢܽܘܬܳܐ ܠܣܰܓܺܝܽܐܘ̣ܬ ܘܰܡܣܰܝܟܽܘܬܳܐ ܕܰܚܛܳܗ̈ܶܐ ܕܺܝܠܰܢ: ܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ ܐܳܘ ܡܳܪܝܳܐ: ܠܳܐ ܒܰܓܙ̈ܳܡܶܐ ܙܺܝ̈ܥܶܐ ܕܪܽܘܓܙܳܐ ܪܰܒܳܐ ܢܰܓܺܝܪܳܐܝ̣ܬ ܬܫܰܢܶܩ ܠܰܢ ܘܰܬܛܰܠܶܩ ܠܰܢ: ܠܳܐ ܬܶܕܚܽܘܩ ܠܰܢ ܡ̣ܶܢ ܩܕܳܡܰܝܟ ܡܳܪܝܳܐ ܛܳܒܳܐ: ܘܕܳܘܰܝ̈ܳܐ ܘܰܨܪ̈ܺܝܟܶܐ ܡ̣ܶܢ ܪ̈ܰܚܡܶܐ ܘܰܚܢܳܢܳܐ ܕܺܝܠܳܟ ܢܶܗܘܶܐ: ܠܳܐ ܬܰܗܡܶܐ ܡܶܢܰܢ ܡܳܪܝܳܐ: ܠܳܐ ܬܶܪܓܰܙ ܥܠܰܝܢ ܚܰܢܳܢܳܐ: ܕܪܰܥܽܘܡܳܐܝ̣ܬ ܘܡܶܬܚܰܢܢܳܐܝ̣ܬ ܠܘܳܬܳܟ ܓܳܥܶܝܢܰܢ: ܠܐ ܬܶܢܰܕ ܠܳܟ ܡܶܢܰܢ ܒܰܣܺܝܡܳܐ ܡܶܛܽܠ ܣܰܪܝܽܘܬܳܐ ܕܰܥܒܳܕܰܝ̈ܢ ܒܺܝ̣̈ܫܶܐ: ܗܳܠܶܝܢ ܕܰܒܟܽܠܙܒܰܢ ܘܰܒܟܽܠܥܶܕܳܢ ܠܳܐ ܢܳܡܽܘܣܳܐܝ̣ܬ ܣܳܥܪܺܝܢܰܢ ܩܕܳܡܰܝܟ ܐܳܘ ܡܳܪܝܳܐ: ܕܠܳܐ ܠܥܳܠܰܡ ܟܰܕ ܐܳܠܶܡ ܐܰܢ̱ܬ ܬܶܛܰܪ ܠܰܢ ܒܺܝ̈ܫܳܬܳܐ ܕܺܝܠܰܢ: ܝܳܕܥܺܝܢܰܢ ܗ̱ܘ̣ ܘܰܡܦܺܝܣܺܝܢܰܢ ܕܠܐܘ̣ܪܚܳܐ ܕܶܝܢ ܕܦܽܘܩ̈ܕܳܢܰܝܟ ܛܥܰܝܢܰܢ ܘܰܠܢܳܡܽܘܣܰܝ̈ܟ ܫܳܛܢܰܢ: ܘܟܽܠܳܗ̇ ܫܟܺܝܪܽܘܬܳܐ ܕܣܳܥܽܘܪܽܘܬ ܒܺܝ̈ܫܳܬܳܐ ܒܰܩܢܽܘܡܰܢ ܚܰܘܺܝܢܰܢ: ܠܳܐ ܬܰܣܠܐܷ ܠܰܢ ܟܰܕ ܬܳܝܒܺܝܢܰܢ ܩܕܳܡܰܝܟ: ܗܰܘ ܕܳܐܦܠܐ ܠܗܳܝ ܬܝܳܒܽܘܬܳܐ ܕܐܳܚܳܒ ܡܰܠܟܳܐ ܡܫܰܡܠܝܳܐܝ̣ܬ ܐܰܣܠܺܝܬ: ܠܢܺܝܢܘܶܐ ܕܶܝܢ ܗܳܝ ܕܣܰܓܺܝ ܐܰܪܫܥܰܬ݀ ܒܝܰܕ ܟܳܪܽܘܙܽܘܬܶܗ ܕܝܰܘܢܳܢ ܐܰܦܢܝ̣ܬ : ܘܒܳܟ ܬܝܳܒܽܘܬܳܐ ܕܩܰܪܒܰܬ݀ ܩܕܳܡܰܝܟ ܫܰܘܙܶܒܬܳܗ̇: ܘܰܒܝܰܕ ܕܶܡ̈ܥܶܐ ܕܐܶܫܕܰܬ݀ ܥܰܠ ܬܰܪܥܳܟ ܐܶܬܪܰܥܺܝܬ ܠܳܗ̇: ܘܰܒܝܰܕ ܓܥܳܬܳܐ ܘܬܶܢܚ̈ܳܬܳܐ ܪ̈ܰܥܽܘܡܳܬܳܐ ܪܰܚܶܡܬ ܥܠܶܝܗ̇: ܘܰܕܚܶܣܠܰܬ݀ ܡ̣ܶܢ ܦܽܘܡܳܐ ܕܫܰܒܪ̈ܶܐ ܘܰܕܝܰܠܽܘ̈ܕܶܐ ܣܰܒܥܽܘܬܳܐ ܕܶܝܢ ܕܣܰܝܒܳܪܬܳܐ ܚܣܰܟܬܳܗ̇ ܡ̣ܶܢ ܫܰܒ̈ܛܶܐ ܕܰܚܕܺܝܪܺܝܢ ܗܘܰܘ ܠܳܗ̇: ܘܰܕܥܶܒܪܰܬ ܡ̣ܶܢ ܟܽܠܗܶܝܢ ܒܺܝ̈ܫܳܬܳܐ: ܐܰܥܒ̣ܰܪܬ ܠܪܽܘܓܙܳܐ ܡܰܪܺܝܪܳܐ ܗܰܘ ܕܡ̣ܶܢ ܟܺܐܢܽܘܬܳܟ ܓܙܺܝܪ ܗ̱ܘܳܐ ܥܠܶܝܗ̇: ܘܰܥܒܰܕܬܳܗ̇ ܕܽܘܡܝܳܐ ܘܝܽܘܩܢܳܐ ܠܟܽܠܗܽܘܢ ܬܰܝ̈ܳܒܶܐ ܕܒܳܗ̇ ܢܶܬܕܰܡܽܘܢ: ܘܡ̣ܶܢ ܗܦܽܘܟܝܳܐ ܗܰܘ ܡܰܘܒܕܳܢܳܐ ܘܡܶܬܗܰܦܟܳܢܽܘܬܳܐ ܗܳܝ ܦܳܪܽܘܩܳܝܬܳܐ ܐܶܬܬܰܓܰܪܬ ܠܗܽܘܢ: ܐܳܦ ܗܳܫܳܐ ܐܳܘ ܡܳܪܝܳܐ: ܡܳܪܳܐ ܛܳܒܳܐ ܘܠܳܐ ܡܶܬܥ̱ܰܗܕܳܢܳܐ ܕܒܺܝ̈ܫܳܬܳܐ ܐܶܬܬܢܺܝܚ ܐܶܬܦܰܢ: ܚܽܘܣ ܘܪܰܚܶܡܥܠܰܝܢ ܫܒܽܘܩ ܘܚܰܣܳܐ ܠܰܢ ܠܥܰܒ̈ܕܶܐ ܕܺܝܠܳܟ: ܕܗܳܐ ܒܰܪܟܺܝܢܽܘܬ ܨܰܘܪܳܐ ܘܰܒܚܰܫܳܐ ܪܰܒܳܐ ܕܰܬܝܳܒܽܘܬܳܐ ܩܕܳܡܰܝܟ ܡܶܬܟܰܫܦܺܝܢܰܢ: ܕܰܟܳܐ ܘܰܡܪܽܘܩ ܘܩܰܕܶܫ ܠܰܢ: ܘܢܰܛܰܪ ܠܰܢ ܡܨ̈ܰܠܠܶܐ ܘܰܚܠܺܝ̣̈ܡܶܐ ܥܒܶܕ ܠܰܢ: ܬܰܝ̈ܳܒܶܐ ܫܰܪܺܝܪ̈ܶܐ ܫܰܡܠܐܴ ܠܰܢ: ܢܳܛܽܘܪ̈ܶܐ ܕܢܳܡܽܘ̈ܣܰܝܟ ܓܡܽܘܪ ܠܰܢ: ܘܡ̣ܶܢ ܒܢܰܝ̈ܢܳܫܳܐ ܒܺܝ̈ܫܶܐ ܫܰܘܙܶܒ ܠܰܢ: ܘܡ̣ܶܢ ܟܽܠܳܗ̇ ܡܰܥܒܕܳܢܽܘܬܳܐ ܫܺܐܕܳܢܳܝܬܳܐ ܚܰܪܰܪ ܠܰܢ: ܘܡ̣ܶܢ ܟܽܠܗܽܘܢ ܠܳܐ ܢܳܡܽܘܣܳܝ̈ܶܐ ܦܰܨܳܐ ܠܰܢ: ܘܒܰܓܒܰܝ̈ܳܐ ܕܺܝܠܳܟ ܡܢܺܝ ܠܰܢ: ܘܰܒܡܶܢܝܳܢܳܐ ܕܰܡܢܺܝ̈ܚܳܢܰܝܟ ܚܰܠܶܛ ܠܰܢ: ܘܠܰܛܝܳܪܳܐ ܗܰܘ ܕܰܠܥܶܠ ܐܰܫܘܳܐ ܠܰܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܒܛܰܝܒܽܘܬܳܐ ܘܰܒܪ̈ܰܚܡܶܐ ܘܰܒܪܶܚܡܰܬ݀ ܐ̱ܢܳܫܽܘܬܳܐ ܕܺܝܚܺܝܕܳܝܳܐ ܒܪܳܐ ܕܺܝܠܳܟ ܐܰܢܺܝܚ: ܕܥܰܡܶܗ ܠܳܟ ܦܐܷܐ ܫܽܘܒܚܳܐ ܘܺܐܝܩܳܪܳܐ ܘܽܐܘܚܕܳܢܳܐ ܥܰܡ ܪܽܘܚܳܐ ܕܺܝܠܳܟ ܩܰܕܺܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܢܶܬܚܰܣܶܐ ܕܶܝܢ ܘܢܶܬܕܰܟܶܐ ܘܢܶܬܩܰܕܰܫ ܘܢܶܬܚܰܠܰܠ ܘܢܶܬܡܪܶܩ: ܡܫܺܝܚܳܐ ܐܰܠܳܗܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܩܕܳܡܰܝܟ ܒܝܰܘ̈ܡܳܬܳܐ ܗܳܠܶܝܢ ܕܰܒܗܽܘܢ ܐܰܪܡܺܝܢܰܢ ܪ̈ܶܓܠܰܝܢ ܒܽܐܘܪܚܳܐ ܕܙܰܕܺܝܩܽܘܬܳܐ: ܗܳܫܳܐ܀