ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܡܫܺܝܚܳܐ ܕܰܒܕܶܢܚܶܗ ܐܰܢܗܰܪ ܠܰܫ̈ܡܰܝܳܢܶܐ. ܐܳܦ ܠܰܐܪ̈ܥܳܢܳܝܶܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܰܥܡܳܕܟ ܒܰܪ ܐܰܠܳܗܳܐ ܝܽܘܪܕܢܳܢ ܢܰܗܪܳܐ. ܒܬܶܗܪܳܐ ܩܳܐܶܡ ܗ̱ܘܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܝܰܘܡܳܢܳܐ ܠܰܢ ܐܶܬܚܰܘܺܝ ܐ̱ܪܳܙܳܐ ܟܰܣܝܳܐ. ܕܰܬܠܺܝܬܳܝܽܘܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܝܰܘܡܳܢ ܚܳܕܶܝܢ ܥܶܠܳܝ̈ܶܐ ܘܪܳܘܙܺܝܢ ܒܰܐܪܥܳܐ. ܟܶܢ̈ܫܶܐ ܕܬܰܚ̈ܬܳܝܶܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܪܺܝܟܽ ܗ̱ܘ ܡܫܺܝܚܳܐ ܕܒܰܥܡܳܕܶܗ ܚܰܕܬܶܗ ܠܥܳܠܡܳܐ܆ ܕܰܒܠܺܝ ܒܰܚܛܺܝܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܫܺܝܚܳܐ ܕܰܐܪܟܶܢ ܪܰܒܽܘܬܶܗ ܘܶܐܬܳܐ ܕܢܶܥܡܰܕ܆ ܡܶܢ ܐܺܝ̈ܕܰܝ ܥܰܒܕܶܗ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܢܚܶܬ ܗ̱ܘܳܐ ܘܰܥܡܰܕ ܒܓܰܘ ܡܰܝ̈ܳܐ ܗܰܘ ܡܰܒܽܘܥܳܐ. ܕܟܽܠܗܶܝܢ ܛܳܒ̈ܳܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܐܰܙܥܶܩ ܐܰܒܳܐ ܡܶܢ ܪܰܘܡܳܐ ܕܗܳܢܰܘ ܚܰܒܺܝܒܝ. ܕܒܶܗ ܗܽܘ ܐܶܨܛܒܺܝܬ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܟܽܠܗܶܝܢ ܢܒܺܝܰܘ̈ܳܬܳܐ

ܟܽܠܗܶܝܢ ܢܒܺܝܰܘ̈ܳܬܳܐ ܫܩܰܠ̈ܝ ܫܽܘܠܳܡܳܐ: ܒܰܥܡܳܕܶܗ ܕܺܝܚܺܝܕܳܝܳܐ: ܕܰܒܝܽܘܪܕܢܳܢ ܢܰܗܪܳܐ ܝܰܘܡܳܢ: ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܐܶܬܳܐ ܡܳܪܰܢ ܠܢܰܗܪܳܐ ܕܢܶܚܽܘܬ ܢܶܥܡܰܕ: ܘܛܰܪܛܰܥ ܗ̱ܘܳܐ ܒܕܶܚܠܳܐ ܪܰܒܳܐ: ܕܰܚܙܳܐ ܗ̱ܘܳܐ ܠܡܳܪܶܗ ܕܶܐܬܳܐ: ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܨܶܡܚܳܐ ܕܡܶܢ ܐܰܒܳܐ܆ ܗܰܘ ܕܰܕܢܰܚ ܡܶܢ ܫܡܰܝ ܫܡܰܝ̈ܳܐ܆ ܘܰܥܡܰܕ ܗ̱ܘܳܐ ܒܝܽܘܪܕܢܳܢ ܢܰܗܪܳܐ܆ ܘܰܐܢܗܰܪ ܠܟܽܠܗܶܝܢ ܒܶܪ̈ܝܳܬܳܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܡܫܺܝܚܳܐ ܐܰܠܳܗܳܐ܆ ܗܰܘ ܕܰܥܡܰܕ ܡܶܢ ܝܽܘܚܰܢܳܢ܆ ܘܶܐܣܬܗܶܕ ܡܶܢ ܐܰܒܳܐ ܕܫܰܠܚܶܗ܆ ܘܶܐܬܚܰܘܺܝ ܡܶܢ ܪܽܘܚ ܩܽܘܕܫܳܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܢܚܶܬ ܗ̱ܘܳܐ ܦܳܪܽܘܩܰܢ܆ ܘܰܥܡܰܕ ܗ̱ܘܳܐ ܒܝܽܘܪܕܢܳܢ ܢܰܗܪܳܐ܆ ܕܰܢܩܰܕܶܫ ܡܰܥܡܽܘܕܺܝܬܳܐ܆ ܠܚܽܘܣܳܝ ܚܰܘ̈ܒܶܐ ܘܰܚ̈ܛܳܗܶܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܐ̱ܪܳܙܳܐ ܬܠܺܝܬܳܝܳܐ. ܕܢܰܚ ܠܰܢ ܝܰܘܡܳܢ ܥܰܠ ܝܽܘܪܕܢܳܢ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܘܪܽܘܚܳܐ ܕܩܽܘܕܫܳܐ ܕܰܡܪܰܚܶܦ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܐܰܒܳܐ ܡܳܪܳܐ ܕܢܰܚ ܠܰܢ ܘܡܶܢ

ܐ̱ܪܳܙܳܐ ܪܰܒܳܐ ܘܰܫܒܺܝܚܳܐ܆ ܕܰܡܟܰܣܰܝ ܗ̱ܘܳܐ ܡܶܢ ܕܳܪ̈ܶܐ܆ ܘܰܢܒܺܝ̈ܶܐ ܘܡܰܠ̈ܟܶܐ ܟܽܠܗܽܘܢ ܣܰܟܺܝܘ ܕܢܶܚܙܽܘܢܳܝܗ̱ܝ܆ ܐܶܬܓܠܺܝ ܗ̱ܘܳܐ ܒܝܽܘܪܕܢܳܢ ܢܰܗܪܳܐ܆ ܘܶܐܬܗܰܝܡܰܢ ܒܰܐܪܒܰܥ ܦܶܢ̈ܝܳܢ܆ ܘܰܐܟܪܶܙ ܗ̱ܘܳܐ ܠܟܽܠܗܽܘܢ ܥܰܡ̱̈ܡܶܐ܆ ܫܽܘܒܚܳܐ ܠܡܽܘܟܳܟܶܗ܀

ܫܽܘܒܚܳܐ

ܥܰܡ̱̈ܡܶܐ ܙܡܰܪܘ ܠܶܗ ܬܶܫܒܽܘܚܬܳܐ܆ ܠܗܰܘ ܡܰܠܟܳܐ ܕܡܰܟܶܟ ܢܰܦܫܶܗ܆ ܘܰܥܡܰܕ ܒܢܰܗܪܳܐ ܕܰܫܦܰܪ ܠܶܗ ܡܶܛܽܠ ܦܽܘܪܩܳܢܰܢ܆ ܘܰܒܡܰܝ̈ܳܐ ܘܢܽܘܪܳܐ ܐܰܥܡܕܰܢ܆ ܘܚܰܕܬܶܗ ܠܓܶܢܣܰܢ ܕܶܐܬܚܰܒܰܠ܆ ܘܥܰܒܕܰܢ ܝܳܪ̈ܬܶܐ ܒܡܰܠܟܽܘܬܶܗ ܫܽܘܒܚܳܐ ܠܫܳܠܽܘܚܶܗ܀

ܡܶܢ ܥܳܠܰܡ

ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ܆ ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝ̣ܺܝ̣ܢ܆ ܕܢܶܗܘܶܐ ܒܢܰܝ̈ܳܐ ܠܰܐܠܳܗܳܐ: ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐ‌ܠܳܗܳܐ ܢܢܺܝܚ ܐܶܢܽܘܢ: ܒܗܳܝ ܡܰܠܟܽܘܬܳܐ ܕܰܫܡܰܝܳܐ. ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ: ܒܥܳܠܡܳܐ ܕܠܳܐ ܥܳܒܰܪ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܗܕܰܘ̈ܗ̱ܝ ܐܰܢ̱ܬܽܘܢ
ܛܽܘܒܰܝܟܝ ܡܰܪܝܰܡ ܕܡܶܢ ܛܰܠܝܽܘܬܶܟܝ

ܬܪܶܝܢ ܟܳܪ̈ܽܘܙܶܐ. ܗ̱ܘܰܘ ܠܶܗ ܠܰܒܪܳܐ܆ ܘܰܐܟܪܶܙܘ ܥܠܰܘܗ̱ܝ ܒܪܰܘܡܳܐ ܘܰܒܥܽܘܡܩܳܐ܆ ܟܰܘܟܰܒ ܢܽܘܗܪܳܐ. ܝܰܒܶܒ ܡܶܢ ܠܥܶܠ ܐܳܦ ܝܽܘܚܰܢܳܢ܆ ܐܰܟܪܶܙ ܥܰܠ ܐܰܪܥܳܐ܆ ܕܗܳܢܰܘ ܐܶܡܪܶܗ܆ ܘܰܒܪܶܗ ܚܰܝܳܐ ܕܰܐܠܳܗܳܐ. ܕܰܐܟܪܶܙܘ ܥܠܰܘܗ̱ܝ ܢܒܺܝ̈ܶܐ ܒܪܽܘܚܳܐ܀

ܫܽܘܒܚܳܐ

ܣܪ̈ܳܦܶܐ ܕܢܽܘܪܳܐ. ܒܓܶܦ̈ܶܐ ܕܢܽܘܪܳܐ ܛܳܫܶܝܢ ܡܶܢܶܗ܆ ܒܙܰܘܥܳܐ ܕܠܳܐ ܢܺܐܩܕܽܘܢ܆ ܐܰܪܟܶܢ ܪܺܝܫܶܗ܆ ܩܕܳܡ ܝܽܘܚܰܢܳܢ. ܕܢܶܥܡܰܕ ܡܶܢܶܗ ܗܰܘ ܫܳܒܶܩ ܚܰܘ̈ܒܶܐ܆ ܘܶܐܬܩܰܕܰܫܘ ܗ̱ܘܰܘ. ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ ܒܰܥܡܳܕܶܗ ܕܡܰܠܟܳܐ ܡܫܺܝܚܳܐ܀

ܡܶܢ ܥܳܠܰܡ

ܥܒܶܕ ܒܰܚܢܳܢܳܟ ܘܰܒܛܰܝܒܽܘܬܳܟ܆ ܡܳܪܝܳܐ ܡܳܪܰܢ: ܕܽܘܟܪܳܢ ܥܰܢܺܝ̈ܕܶܐ. ܕܶܐܟܰܠܘ ܦܰܓܪܳܟ ܘܶܐܫܬܺܝܘ ܠܰܕܡܳܟ. ܘܰܫܟܶܒܘ ܘܶܐܬܬܢܝ̣ܚܘ: ܡܳܪܰܢ ܥܰܠ ܣܰܒܪܳܟ. ܘܡܳܐ ܕܳܐܬܶܐ ܐܰܢ̱ܬ: ܠܰܡܕܳܢ ܛܽܘܗ̈ܡܶܐ ܘܫܰܪ̈ܒܳܬܳܐ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܀

ܦܶܬܓܳܡܳܐ: ܡܳܐ ܠܳܟ ܝܰܡܳܐ ܕܰܥܪܰܩܬ܆ ܘܝܽܘܪܕܢܳܢ ܕܰܗܦܰܟܬ ܠܒܶܣܬܪܳܟ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܳܝܡܳܐ ܟܰܠܬܳܐ ܨܶܝܕ ܫܰܪܺܝܪܳܐ ܒܰܪ ܥܰܩܪܽܘܬܳܐ܆ ܘܰܡܣܰܟܝܳܐ ܠܶܗ ܕܶܐܡܰܬܝ ܪܳܡܶܙ ܕܗܳܢܰܘ ܚܰܬܢܳܐ܆ ܟܰܕ ܗܺܝ ܟܰܠܬܳܐ ܚܳܝܪܳܐ ܕܬܶܚܙܶܐ ܕܰܐܝܢܰܘ ܚܰܬܢܳܐ܆ ܢܦܰܩ ܒܰܪ ܡܰܠܟܳܐ ܡܶܢ ܓܰܘ ܟܶܢ̈ܫܶܐ ܕܢܺܐܬܶܐ ܠܢܰܗܪܳܐ܀

ܢܦܰܩ ܗ̱ܘܳܐ ܡܶܢܶܗ ܪܶܬܚܳܐ ܕܩܽܘܕܫܳܐ ܘܩܳܡ ܥܰܠ ܡܰܝ̈ܳܐ܆ ܘܫܶܓܪܰܬ ܐܶܢܽܘܢ ܚܰܡܺܝܡܽܘܬܳܐ ܕܗܳܝ ܢܰܒܪܰܫܬܶܗ܆ ܣܶܦܰܬ ܢܽܘܪܶܗ ܒܰܝܢܳܬ ܓܰܠ̱̈ܠܶܐ ܥܰܕܠܳܐ ܢܶܚܽܘܬ܆ ܘܛܰܪܛܰܥ ܢܰܗܪܳܐ ܒܪܶܬܚܳܐ ܪܰܒܳܐ ܕܫܰܠܗܶܒܺܝܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀