ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܝܓ: ܝܐ ـ ܝܕ܇ ܝܕ:ܐ ـ ܟܓ Romans 13:11-14, 14:1-23

ܗܰܬ̣ܶܐ ܝܺܕ̥ܰܥܽܘ܆ ܕܽܐܘ ܙܰܒܢܳܐ ܘܺܐܝ̣ ܫܳܥܬ̣ܳܐ ܕܡܰܚܺܝܣܺܝܢܰܐ ܡܺܐܝ ܫܰܢܬ̣ܰܝܕ̥ܰܢܝܳܐ. ܡܺܝܕ̥ܶܐ ܕܽܐܘܥܕܳܐ، ܡܩܰܪܰܘܠܶܗ ܠܽܐܘ ܟ̣ܰܠܰܨܰܝܕ̥ܰܢ، ܙܶܬ ܡܺܐܝ ܢܰܩܩܰܐ ܕܶܡܗܰܝܡܰܢ ܠܰܢ. ܬܰܐܝܶܡ ܐܽܘ ܠܰܠܝܳܐ، ܡܩܰܪܰܘ ܠܶܗ ܠܽܐܘ ܐܺܝܡܳܡܳܐ. ܡܚܰܠܩܺܝܢܰܐ ܐܰ ܥܡ̈ܰܠܰܬ ܕܺܐܝ ܥܽܘܬܡܰܐ، ܘܠܰܘܫܺܝܢܰܐ ܐܽܘ ܨܺܝܠܰܚ ܕܽܐܘ ܢܽܘܗܪܳܐ. ܘܟ̣ܶܕ ܒܽܐܘ ܐܺܝܡܳܡܳܐ، ܒܫܶܟܶܠ ܛܳܘܳܐ ܡܗܰܠܟܺܝܢܰܐ. ܠܳܐ ܒܽܐܘ ܙܡܳܪܳܐ ܘܒܺܐܝ ܪܰܘܳܝܽܘܬ̣ܳܐ. ܘܠܳܐ ܒܽܐܘ ܕܡܳܟ̣ܳܐ ܚܰܪܰܡ. ܘܠܳܐ ܒܽܐܘ ܚܣܳܡܳܐ ܘܒܺܐܝ ܥܰܟܣܺܝܶܐ. ܐܶܠܳܐ ܠܘܰܫܽܘ ܠܡܳܪܰܢ ܝܶܫܽܘܥ ܡܫܺܝ̣ܚܳܐ. ܠܳܐ ܣܰܝܡܺܝܬܽܘ ܬܰܕܒܺܝܪ̈ܰܬ (ܒܽܘ̈ܣܳܡܶܐ) ܠܽܘ ܔܰܣܰܕܰܬ̥ܟܽܘ ܠܰܪ̈ܰܝܰܐܓܰܬ. ܠܐܰܝܢܰܐ ܕܟܶܬܝܳܐ ܕ̥ܰܥܺܝܦ ܒܺܐܝ ܗܰܝܡܳܢܽܘܬ̣ܳܐ، ܗܰܘܽܘ ܠܶܗ ܐܺܝܕ̥ܳܐ. ܠܳܐ ܗܳܘܶܝܬܽܘ ܦܠܺܝ̈ܓ̥ܶܐ ܒܰܦܶܟܪ̈ܰܬ̣ܟ̣ܽܘ. ܡܺܝܕ̥ܶܐ ܕܟܺܝܬ ܕܟܳܡܗܰܝܡܶܢ ܕܟܺܝ̣ܒܶܐ ܐܳܟ̣ܶܠ ܟܽܠ ܡܶܕܶܐ. ܐܶܠܳܐ ܐܺܝܕ̥ܰܐ ܐܺܝ ܗܰܝܡܳܢܽܘܬ̥ܰܝܕ̥ܶܗ̱ ܕ̥ܰܥܺܝܦܝܳܐ، ܟܺܝܬ ܕܝܰܪܳܩܽܘܬܳܐ ܐܳܟ̥ܶܠ. ܛܪܳܐ ܗܰܘܳܐ ܕܟܳܐܟ̣ܶܠ ܠܰܗ̱ܘܳܐ ܕܠܳܐ ܟܳܐܟ̣ܶܠ ܠܳܐ ܡܚܰܩܶܪ. ܘܠܳܐ ܗܰܘܳܐ ܕܠܳܐ ܟܳܐܟ̣ܶܠ ܣܬܶܐ، ܠܰܗ̱ܘܳܐ ܕܟܳܐܟ̣ܶܠ ܠܳܐ ܚܳܟܶܡ. ܡܺܝܕ̥ܶܐ ܕܐܰܠܳܗܳܐ ܡܰܩܒܶܠܶܐ. ܗܰܬ ܡܰܢ ܗܰܬ ܕܕܰܝܢܰܬ (ܓܚܽܘܟܡܰܬ) ܠܽܐܘ ܓܪܶܥܳܐ ܕܠܰܬܝܳܐ ܕܺܝܕ̥ܳܟ؟ ܐܺܝܕ̥ܰܐ ܓܩܳܝܶܡ، ܘܺܐܝܕ̥ܰܐ ܓܢܳܦܶܠ ܐܽܘ ܡܳܪܰܝܕ̥ܶܗ ܓܶܡܩܰܐܪܶܪ. ܐܶܠܳܐ ܓܩܳܝܶܡ. ܡܺܝܕ̥ܶܐ ܕܰܐܠܳܗܳܐ، ܟܩܳܕܶܪ ܕܡܰܩܶܡܠܶܗ. ܟܺܝܬ ܚܰܕ̱ ܟܳܡܝܰܩܶܪ ܝܰܘܡܳܐ ܙܶܬ ܡܶܐ ܝܰܘܡܳܐ. ܘܟܺܝܬ ܕܟܳܡܝܰܩܶܪ ܟܽܠܠܶܗ̱ ܐܰ ܝܰܘ̈ܡܶܐ. ܟܽܠ ܚܰܕ̱ ܛܪܳܐ ܗܳܘܶܐ ܪܰܕ̥ܝܳܐ ܒܽܐܘ ܦܶܟܪܰܝܕ̥ܶܗ. ܗܰܘܳܐ ܕܟܳܡܝܰܩܶܪ ܐܽܘ ܝܰܘܡܳܐ، ܠܽܐܘ ܡܳܪܰܝܕܶܗ ܟܳܡܝܰܩܶܪ . ܘܟܽܠ ܕܠܳܐ ܡܝܰܩܶܪ ܠܽܐܘ ܝܰܘܡܳܐ، ܠܽܐܘ ܡܳܪܰܝܕ̥ܶܗ ܠܳܐ ܟܳܡܝܰܩܶܪ. ܘܕܳܐܟ̣ܶܠ، ܠܽܐܘ ܡܳܪܰܝܕ̥ܶܗ ܟܳܟ̣ܶܠ܆ ܘܠܰܐܠܳܗܳܐ ܓܡܰܘܕܶܐ. ܘܕܠܳܐ ܟܳܟ̣ܶܠ܆ ܠܽܐܘ ܡܳܪܰܝܕ̥ܶܗ ܠܳܐ ܟܳܟ̣ܶܠ܆ ܘܓܡܰܘܕܶܐ ܠܰܐܠܳܗܳܐ. ܠܰܝܬ ܚܰܕ̱ ܡܶܢܰܢ ܕܠܰܫܰܢ ܪܽܘܚܶܗ ܓܚܳܝܶܐ (ܓܥܳܝܶܫ). ܘܠܳܐ ܚܰܕ ܕܶܠܪܽܘܚܶܗ ܓܡܳܝܶܬ̣. ܡܺܝܕ̥ܶܐ ܕܶܐܢ ܕܚܳܝܶܢܰܐ ܠܽܐܘ ܡܳܪܰܝܕ̥ܰܢ ܓܚܳܝܶܢܰܐ. ܘܕܶܐܢ ܕܡܰܝܬ̣ܺܝܢܰܐ ܠܽܐܘ ܡܳܪܰܝܕ̥ܰܢ ܓܡܰܝܬ̣ܺܝܢܰܐ. ܘܶܐܢ ܕܚܳܝܶܢܰܐ ܘܶܐܢ ܕܡܰܝܬ̣ܺܝܢܰܐ ܕܡܳܪܰܢ ܢܰܐ. ܡܰܗ̱ܘܟ̣ܰܐ ܡܰܐܝܶܬ̥ ܡܫܺܝ̣ܚܳܐ ܘܩܰܐܝܶܡ ܘܗܰܘܺܝ ܚܰܝܳܐ، ܠܰܫܰܢ ܕܗܳܘܶܐ ܡܳܪܳܐ ܠܰܚܚܰܝ̈ܶܐ ܘܠܰܡܡܺܝ̣̈ܬ̣ܶܐ. ܐܶܠܳܐ ܗܰܬ ܩܰܝ ܓܚܳܟܡܰܬ ܠܰܐܚܽܘܢܳܟ؟ ܐܰܘ ܩܰܝ ܟܳܡܚܰܩܪܰܬ ܐܰܚܽܘܢܳܟ؟ ܡܺܝܕ̥ܶܐ ܕܟܽܠܰܢ ܓܩܰܝܡܺܝܢܰܐ ܩܡܽܘ ܟܽܘܪܣܺܝ ܕܶܡܫܺܝ̣ܚܳܐ. ܡܺܝܕ̥ܶܐ ܕܶܟܬ̣ܺܝܘܳܐܝܳܐ: «ܐܳܢܳܐ ܚܰܝܳܐ ܐ̱ܢܳܐ ܟܳܐܡܶܪ ܐܰܠܳܗܳܐ، ܘܶܐܠܺܝ ܓܟܰܝܦܳܐ ܟܽܠ ܒܰܪܟܳܐ، ܘܶܐܠܺܝ ܓܡܰܘܕܶܐ ܟܽܠ ܠܶܫܳܢܳܐ». ܗܰܐܬ̥ܶܐ ܓܡܰܚܽܘܝܳܐ ܕܟܽܠ ܐ̱ܢܳܫܳܐ ܡܺܢܰܢ ܚܽܘܫܒܳܢܳܐ (ܚܰܣܰܐܒ) ܡܶܚܠܰܦ ܪܽܘܚܶܗ ܓܕܳܐܒܶܐ ܠܰܐܠܳܗܳܐ. ܘܗܰܡ ܠܳܐ ܕܰܝܢܺܝܢܰܐ (ܚܽܘܟܡܺܝ̣ܢܰܐ) ܚܰܕ̱ ܠܽܐܘ ܚܰܕ̱. ܐܶܠܳܐ ܗܰܐܬ̣ܶܐ ܒܽܐܘ ܙܳܝܽܘܕܳܐ ܣܽܘܡܽܘ: ܕܬܶܪܒܰܠܬܳܐ ܠܰܐܚܽܘܢܰܝܟ̥ܽܘ ܠܳܐ ܡܰܚܬܽܘܬܽܘ. ܟܳܐܕ̥ܰܥ ܐ̱ܢܳܐ ܘܟܳܡܗܰܝܡܰܢܢܳܐ ܒܡܳܪܰܢ ܝܶܫܽܘܥ، ܕܠܰܝܬ ܡܶܕܶܐ ܕܶܠܪܽܘܚܶܗ ܚܰܪܰܡܝܳܐ. ܐܶܠܳܐ ܠܰܗ̱ܘܳܐ ܕܚܳܫܽܘ ܐܽܘ ܡܶܕܶܐ ܚܰܪܰܡ܆ ܠܰܗ̱ܘܳܐ ܒܶܠܚܽܘܕܶܗ ܚܰܪܰܡܝܳܐ. ܒܰܪܶܟ̥ܡܳܪܝ ܀